Dombivli Crime : झोपेची गोळी दिली नाही; मेडिकलमधील विक्रेत्याला पिता पुत्राची मारहाण

डोंबिवली, ता. 26 - मेडिकल स्टोअरमध्ये विक्रेत्याकडे झोपेची गोळी त्यांनी मागितली. मात्र दुकानात झोपेची गोळी नाही असे विक्रेत्याने सांगताच याचा राग आल्याने पिता पुत्रांनी मेडिकल मधील विक्रेत्याला बेदम मारहाण केल्याची घटना खोणी पलावा येथे घडली आहे. याप्रकरणी मानपाडा पोलिस ठाण्यात मेडिकल मधील विक्रेता अजय स्वामी (वय 32) यांच्या तक्रारीवरुन दिपक करोडिया (वय 54) व त्यांचा मुलगा दर्शन करोडीया (वय 32) यांच्या विरोधात गुन्हा दाखल करण्यात आला आहे.

दिपक हे खोणी पलावा फेज 2 मध्ये लेकसाईड मध्ये राहण्यास आहेत. लेकशोर ग्रीन मधील संजीवनी मेडिकलमध्ये सोमवारी रात्री 10.30 च्या सुमारास दिपक हे मुलासह हे गेले होते. दुकान बंद करण्याची वेळ झाली होती. तेवढ्यात तेथे काम करणाऱ्या अजय यांच्याकडे दिपक यांनी झोपेची गोळी मागितली. त्यांच्याजवळ डॉक्टरांची औषधाची चिठ्ठी नव्हती, तरीही ते गोळी मागत होते. यावेळी अजय याने दुकानात झोपेची गोळी नाही असे सांगितले.

याचा राग दिपक यांना आल्याने त्यांनी अजयला शिविगाळ करत हाताच्या चापटीने मारहाण केली. त्यानंतर दिपक व दर्शनने दुकानात शिरुन तेथे असलेल्या वायपरने अजयला बेदम मारहाण केली. या मारहाणीत अजय यांना दुखापत झाली आहे. याप्रकरणी मानपाडा पोलिस ठाण्यात गुन्हा दाखल करण्यात आला असून पोलीस उपनिरीक्षक गणेश मुसळे या प्रकरणाचा अधिक तपास करत आहेत.