MMRDA : ठाणे-बोरिवली भूमिगत मार्गासाठी आर्थिक सल्लागार नेमणार...

मुंबई : ठाणे-बोरिवली भूमिगत मार्गाच्या बांधणीसाठी सुधारित आराखड्यानुसार १६ हजार ६०० कोटी इतका खर्च अपेक्षित आहे. हा निधी उभारत असताना कर्ज उभारणीसाठी आता एमआरडीएने आर्थिक सल्लागार नेमण्याची तयारी केली आहे. लवकरच आर्थिक सल्लागाराच्या नेमणुकीसाठी निविदा काढण्यात येणार असल्याची माहिती एमएमआरडीएने दिली आहे.

ठाणे-बोरिवली दरम्यान ११.८ किमीच्या भमिगत मार्गाची बांधणी करण्यात येणार आहे. या मार्गाच्या बांधणीसाठी एमएमआरडीएने मेघा इंजिनिअरिंग इन्फ्रास्ट्रक्चर प्रायव्हेट लिमिटेड या कंपनीची नियुक्ती केली आहे. सुधारित आराखड्यानुसार या मार्गीकेच्या ११.८ कि.मी. लांबीपैकी ४.४३ कि.मी. लांबी ही ठाणे जिल्ह्यातुन व ७.४ कि.मी लांबी ही बोरीवली जिल्ह्यातुन प्रस्तावित आहे.

तर बोगद्या कडे जाण्यासाठी ठाण्याच्या दिशेने घोडबंदर येथे उड्डाण पुलाची उभारणी करण्यात येणार आहे. प्रकल्पाचा अंदाजित बांधकाम खर्च रॉयल्टी वगळून भूसंपादनासह १६ हजार ६०० कोटी इतका आहे. या प्रकल्पाचे बांधकाम एकुण ३ पॅकेजसमध्ये करण्याचे प्रस्तावित आहे. त्यापैकी स्थापत्य कामाचे २ पॅकेजेस व तिसरा भाग सुनियोजित वाहतुक प्रणाली या कामाचे पॅकेज आहे.

यामध्ये पॅकेज १ (बोरिवली बाजू) साठी येणार खर्च ७२७३ कोटी, पॅकेज २ (ठाणे बाजू) साठी येणारा अंदाजित खर्च ७४६१ कोटी आणि पॅकेज ३मध्ये सिस्टमची खरेदी, स्थापना आणि कार्यान्वित करण्यासाठी येणार अंदाजित खर्च ५३० कोटी इतका आहे.

सुधारित आराखड्यात बोगद्यातील अत्याधुनिक यंत्रणा,ओपन रोड टोलिंग यंत्रणा आणि भुयारी मार्गात प्रत्येकी ३०० मीटर अंतरावर पादचारी क्रॉसिंग पॅकेज उभारण्यात येणार आहे, यामुळे प्रकल्प खर्चात वाढ झाली आहे.

प्रकल्प उभारणीसाठी येणार खर्च आणि त्यासाठी लागणार निधी उभारणीसाठी आर्थिक सल्लागाराची नेमणूक करण्यात येणार आहे. कर्ज उभारणी झाल्यांनतर कर्जाची परतफेड आणि इतर आर्थिक बाबींच्या निश्चितीसाठी आर्थिक सल्लागाराची नेमणूक करण्यात येणार आहे. सल्लागार नियुक्तीसाठी एमएमआरडीएने निविदा जारी केली असून लवकरच आर्थिक सल्लागाराची नेमणूकही करण्यात येईल, अशी माहिती एमएमआरडीएने दिली आहे.