मुंबईत फुलांचे भाव वधारले, जाणून घ्या दादर मार्केटमधली परिस्थिती

मुंबई: दादरमधील मीनाताई ठाकरे फुल मंडई फुलांनी बहरली आहे. सोशल डिस्टन्सिंगचे पालन करून फुल विक्री सुरू आहे. अनेक नागरिक फुलं खरेदीसाठी येत मार्केटमध्ये येताहेत.

गणेशोत्सवाला सुरुवात झाली आहे. त्यानिमित्त अनेक भणेशभक्त खरेदीसाठी दादर मार्केटमध्ये येतात. खासकरून दादरच्या फुल मार्केटमध्ये गणेशभक्तांची गर्दी असते. गणेश चतुर्थीच्या अगोदर फुल बाजारात ग्राहकांनी मोठी गर्दी केली होती. त्यामुळे सोशल डिस्टन्सिंगचा फज्जा उडाला होता. मात्र ही परिस्थिती लक्षात आल्यानंतर प्रशासनाने तात्काळ हालचाल करत मंडईत नियमांचे पालन करण्याचे निर्देश दिले. 

हेही वाचाः  नियमांचं काटेकोरपणे पालन करत दीड दिवसाच्या बाप्पाला निरोप    

दादरच्या मीनाताई ठाकरे मंडईमध्ये सांगली, सातारा, कोल्हापूर, पुणे, नाशिक, नागपूर तसेच बंगळूर येथून फुले विक्रीसाठी येतात. मात्र पाऊस असल्याने यंदा कमी आणि भिजलेला माल जास्त येत आहे. फुले नेण्यासाठी येणाऱ्या नागरिकांचा उत्साह दरवर्षीप्रमाणे आहे. मात्र मंडईमध्ये येणाऱ्या नागरिकांचं तापमान मोजून सॅनिटायईज करून मंडईत पाठवले जाते. तसेच सोशल डिस्टन्सिंगचे पालन करून फुल विक्री केली जाते. मालाची आवक कमी असून मागणी जास्त आहे. त्यामुळे फुलांचे भाव वधारलेत, अशी माहिती मंडईचे संचालक दादाभाऊ येणारे यांनी दिली. तसेच येत्या दोन दिवसात हे भाव कमी होण्याची शक्यता त्यांनी व्यक्त केली.

अधिक वाचाः  मुंबईत पावसाचा जोर ओसरला; ठाणे, पालघर रायगडचीही जाणून घ्या स्थिती
 

• फुल  (किलो)              भाव (रुपयात)
• पिवळा गोंडा              120 - 150       
• नामधारी गोंडा            100 - 120
• कलकत्ता गोंडा           200 - 220
• शेवंती                       100 -150
• गुलछडी                    200 - 220
• कापरी गोंडा               100 - 120
• अस्टर                        120 - 150
• लीली (हजार फुले)        300 - 350

(संपादनः पूजा विचारे)

Ganesh festival 2020 Social Distancing Dadar Flower Market