Palghar Crime : सात हजारांची लाच घेताना सरकारी वकिलाला अटक

पालघर - पोलिस कर्मचारी निर्दोष असल्याचा अहवाल देण्यासाठी सरकारी वकिलाने लाच मागितली होती. पालघरच्या अतिरिक्त सत्र न्यायालयातील वकील सुनील बाबूराव सावंत यांनी सात हजारांची लाच घेताना लाचलुचपत प्रतिबंधक विभागाने रंगेहात पकडले.

पालघर जिल्हा पोलिस दलातील नाईकपदावर असलेल्या कर्मचाऱ्यावर २०१५ मध्ये तारापूर पोलिस ठाण्यात गुन्हा दाखल होता. जून २०२३ मध्ये न्यायालयाने तक्रारदाराला निर्दोष जाहीर केले होते. त्यानंतर पालघर जिल्हा पोलिस दलाकडून तक्रारदाराने पदोन्नतीसाठी अर्ज केला होता. त्याबाबत अधीक्षक कार्यालयाकडून अतिरिक्त सरकारी अभियोक्ता (सरकारी वकील) पालघर यांच्याकडे पत्रव्यवहार करून निर्दोष सुटल्याबाबत अहवाल मागण्यात आला होता. तो अहवाल पोलिस अधीक्षक कार्यालयाला देण्यासंबंधी अतिरिक्त सरकारी अभियोक्ता सावंत यांनी तक्रारदाराकडे दहा हजार रुपये लाचेची मागणी केली होती. मात्र तडजोड करण्यात आल्यावर सात हजार रुपयांची रक्कम ठरवण्यात आली.

लाचलुचपत प्रतिबंधक विभागाकडून हुतात्मा स्मारकाजवळ उपअधीक्षक दयानंद गावडे, पोलिस निरीक्षक शिरीष चौधरी यांच्या मार्गदर्शनाखाली सापळा रचण्यात आला होता. त्यानुसार ही रक्कम घेताना सरकारी वकिलाला रंगेहाथ पकडण्यात आले. सरकारी वकील सुनील सावंत हे पालघर न्यायालयात सरकारी वकील म्हणून गेल्या सात वर्षांपासून काम करत आहेत.