Mumbai Crime: मुंबईत पुन्हा दिवसाढवळ्या गोळीबार; एकाचा मृत्यू

Mumbai Crime: मुंबईतील चुनाभट्टी परिसरात रविवारी झालेल्या गोळीबारात एकाचा मृत्यू झाला असून एका अल्पवयीनासह 3 जण जखमी झाले. पप्पू सुमीत येरुणकर असे मृताचे नाव असून, त्याच्यावर खंडणी व खुनाचा प्रयत्न केल्याचा आरोप असून कुख्यात गुंड आहे.

2 गटांमधील पूर्वीच्या वैमनस्यातून हल्ला करण्यात आल्याची माहिती मिळत आहे.या प्रकरणी चुनाभट्टी पोलीसांनी गुन्ह्याची नोंद करून तपास सुरू केला आहे.

चुनाभट्टीच्या आझाद गल्ली भागात रविवारी दुपारी 3.15 च्या सुमारास अज्ञात मारेकऱ्यानी येरुणकर यांच्यासह एका गटाला लक्ष्य करत किमान 10 गोळ्या झाडल्या. येरुणकर यांच्यासह सर्व जखमींना तात्काळ वैद्यकीय उपचारासाठी सायन रुग्णालयात दाखल करण्यात आल्याची पुष्टी पोलीस अधिकाऱ्यांनी दिली.

मात्र, सायन रुग्णालयातील डॉक्टरानी तपास करून येरुणकर यांना मृत घोषित केले.या प्रकरणी चुनाभट्टी पोलीसांनी गुन्ह्याची नोंद केली असून आरोपीचा शोध घेण्यासाठी पोलिसांनी किमान 9 पथके तयार केली. ही घटना वैयक्तिक वैमनस्यातून घडल्याचे पोलिसांकडून सांगितले जात आहे

“रविवारी दुपारी 3.30 च्या सुमारास चुनाभट्टी परिसरात गोळीबाराची घटना घडली, त्यात सुमीत येरुणकर यांचा मृत्यू झाला. इतर जखमींची प्रकृती स्थिर आहे. आरोपींची ओळख पटली असून तपासासाठी 9 पथके तयार करण्यात आली आहे. गोळीबाराचे कारण वैयक्तिक वैमनस्य आहे,”

- हेमराज सिंह राजपूत. पोलीस उप आयुक्त, मुंबई पोलीस