मी तुझ्यावर प्रेम करतो म्हणत, मुख्याध्यापकाचे विद्यार्थिनीशी अश्लिल चाळे.... 

भिवंडी : भिवंडी तालुक्‍यातील शेलार गाव नदीनाका येथील एका हिंदी माध्यमाच्या शाळेत शिकणाऱ्या एका १४ वर्षीय अल्पवयीन विद्यार्थिनीशी वर्गातच मुख्याध्यापकाने अश्‍लील चाळे केले. त्यामुळे संतप्त नागरिक व पीडित विद्यार्थिनीच्या नातेवाईकांनी विकृत मुख्याध्यापकाला चोप देत पोलिसांच्या हवाली केले.

ही बातमी वाचा ः ती नकळत झालेली चुक गैरप्रकार नाही ः उच्च न्यायालय

प्रमोद नायक (३५) असे मुख्याध्यापकाचे नाव आहे. धक्कादायक बाब म्हणजे हा मुख्याध्यापक अल्पवयीन विद्यार्थिनीशी एकतर्फी प्रेम करीत असल्याचे चौकशीत समोर आले आहे. भिवंडी-वाडा मार्गावर शेलार गावात हिंदी माध्यमिक शाळा असून या शाळेत १४ वर्षांची पीडिता १० वीच्या वर्गात शिक्षण घेत आहे. गेल्या काही महिन्यांपासून आरोपी प्रमोद हा पीडितेवर एकतर्फी प्रेम करीत होता. तीन दिवसांपूर्वीच त्याने तिला शाळेच्या मैदानात गाठून मुख्याध्यापक कार्यालयात येण्यास सांगितले. मात्र, पीडिता गेली नाही. पुन्हा दुसऱ्या दिवशी त्याने तिचा वर्ग सुरू असताना शिपायामार्फत निरोप पाठवून त्याच्या कार्यालयात बोलावले. त्यानंतर मी तुझ्यावर प्रेम करतो, असे म्हणून त्याने तिच्याशी अश्‍लील चाळे करून तिचा विनयभंग केला. 

पालकांसोबत उद्धट वर्तन
पीडित मुलीने घरी येऊन घडलेला प्रकार आपल्या आईवडिलांना सांगितला. आईने नातेवाईकांसह गुरुवारी (ता.२६) सकाळी शाळेत धाव घेऊन त्याला गाठले आणि घडलेल्या प्रकारचा जाब विचारला. मात्र, त्याने उद्धट वर्तन केल्याने पीडित मुलीच्या नातेवाईकांनी संतप्त होऊन त्याला चोप दिला. घटनेची माहिती मिळताच भिवंडी तालुका पोलिसांनी घटनास्थळी धाव घेऊन मुख्याध्यापकाला ताब्यात घेऊन या प्रकरणी गुन्हा दाखल करून गजाआड केले आहे. अधिक तपास पोलिस उपनिरीक्षक सचिन दाभाडे करीत आहे.