Heavy Rain Mumbai : मुंबईत मुसळधार पावसाला सुरुवात; दादर, भायखळा, मस्जिद बंदर परिसरात जोरदार पाऊस

Heavy Rain Mumbai : आज सकाळपासूनच मुंबई आणि उपनगरात मुसळधार पावसाला सुरुवात झाली. दादर, भायखळा आणि मस्जिद बंदर परिसरात सध्या जोरदार पाऊस कोसळतोय. पण अद्याप याचा वाहतुकीवर परिणाम जाणवत नाही, मात्र असाच पाऊस सुरू राहिला तर मुंबईची पुन्हा मुंबई होऊ शकते. साम टीव्हीनं याबाबत वृत्त दिलं आहे.

मुंबई आणि परिसरात शुक्रवारी पावसानं शहर तसेच उपनगरांत पहाटेपासून जोरदार हजेरी लावली आहे. दादर परिसरात सध्या मुसळधार पाऊस सुरु असला तरी अद्याप कुठेही पाणी तुंबलेलं नाही.

दरम्यान, राज्यात सर्वदूर पावसाची शक्यता कायम आहे. मोसमी पावसाचा कमी दाबाचा पट्टा दक्षिणेकडे असून कमी दाबाचे क्षेत्र पश्चिम बंगालच्या उपसागरापर्यंत सक्रिय आहे. त्यामुळं गुजरातपासून ते उत्तर केरळ किनारपट्टीवर समांतर कमी दाबाचा पट्टा कायम आहे. त्यामुळं आजही मुसळधार पावसाचा अंदाज हवामान खात्यानं वर्तवला आहे.

त्यातच रत्नागिरी, सातारा, भंडारा, चंद्रपूर, गडचिरोली आणि गोंदिया या भागात अतिवृष्टीचा इशारा हवामान खात्यानं दिला आहे. तर ठाणे, पालघर, रायगड, सिंधुदुर्ग, पुणे, वर्धा इथं मुसळधार ते अतिमुसळधार पाऊस कोसळण्याचा अंदाज आहे. मुंबई, कोल्हापूरमध्ये सध्या मुसळधार पाऊस सुरु असून जालना, हिंगोली, अकोला, वाशिम, यवतमाळ, बुलढाणा इथं वादळी वाऱ्यासह पावसाचा अंदाज आहे.