आर्यन खानसाठी जुही चावला बनली जामीनदार

मुंबई: क्रुझवरील ड्रग्ज पार्टीप्रकरणी (Drug case) मागच्या २५ दिवसांपासून अटकेत असलेला अभिनेता शाहरुख खानचा मुलगा आर्यन खानला (aryan khan) काल जामीन मंजूर झाला. जामिनाच्या आदेशाची प्रत (bail order) आज मुंबई उच्च न्यायालयाकडून (Mumbai high court) आर्यनच्या वकिलांना मिळाली. पाच पानांची ही आदेशाची प्रत आहे. ही प्रत घेऊन आर्यनचे वकिल सेशन कोर्टात गेले आहेत. सर्व कायदेशीर बाबी आजच व्यवस्थित पूर्ण झाल्या, तर आर्यन आज सुटू शकतो. अभिनेत्री जुही चावला आर्यन खानसाठी जामीनदार बनली आहे. जुही चावला सेशन कोर्टात पोहोचली आहे.

सतीश मानशिंदे यांच्यासोबत जुही सेशन कोर्टात आली. आर्यन खानसाठी जुहीने १ लाख रुपयाच्या जामीन हमीपत्रावर स्वाक्षरी केली. कोर्टाच्या परवानगीशिवाय आर्यनला देश सोडता येणार नाही, असे हायकोर्टाच्या आदेशात म्हटले आहे. जामिनासाठी हायकोर्टाने १० अटी ठेवल्या आहेत.

आर्यनसह त्याचा मित्र आणि प्रकरणातील सहआरोपी अरबाज मर्चंट आणि मुनमुन धमेचा यांचा एक लाख रुपयांच्या जातमुचलक्यावर जामीन मंजूर करण्यात आला आहे. ५ दिवसांहून अधिक काळ कारागृहात असलेल्या आर्यनची आज किंवा शनिवारी सुटका होऊ शकते.

.