बलात्काराचा आरोपी हातात बेड्या असताना मुंबई पोलिसांच्या तावडीतून पळाला

मुंबई: बलात्काराच्या (rape accused) गंभीर गुन्ह्याची नोंद असलेला आरोपी मुंबई पोलिसांच्या (Mumbai police) तावडीतून निसटल्याची धक्कादायक घटना घडली आहे. अविनाश हरीशचंद यादव (२१) असे आरोपीचे नाव आहे. अविनाशला कोविड-१९ (covid-19) चाचणीसाठी कांदिवलीच्या (kandivali) शताब्दी रुग्णालयात नेण्यात येत असताना ही घटना घडली. अविनाश यादव पळाला त्यावेळी त्याच्या हातात बेडया होत्या. त्याने कॉन्स्टेबलला ढकलून पळ काढला. (In mumbai kandivali area handcuff accused fled police custody)

अविनाशला अल्पवयीन मुलीवर बलात्कार केल्याच्या आरोपाखाली २६ जूनला अटक केली होती, अशी माहिती पोलिसांनी दिली. पोलीस चालकाने व्हॅन थांबवली व दुकानातून पाणी आणण्यासाठी म्हणून ते खाली उतरले, तीच संधी साधून आरोपीने दुसऱ्या कॉन्स्टेबलला ढकलून पळ काढला. कांदिवली एमजी रोडच्या दिशेने आरोपीने पळ काढला.

पोलिसांनी आरोपींला शोधण्याचा प्रयत्न केला. पण त्यांना यश मिळाले नाही. आम्ही नवीन गुन्हा नोंदवून तपास सुरु केला आहे असे पोलीस अधिकाऱ्याने सांगितले. टाइम्स ऑफ इंडियाने दिलेल्या वृत्तानुसार, अविनाशचे एका अल्पवयीन मुलीसोबत प्रेमसंबंध होते. दोघेही घरातून पळून गेले होते. त्यानंतर मुलीच्या कुटुंबीयांनी अविनाश विरोधात पोलिसात तक्रार नोंदवली.