ठाणे : क्रिकेट खेळताना दोन धावा न करता बाद झाल्याने आपल्या संघाचा पराभव झाला. त्यातच आई सारखी खासगी शिकवणीला जाण्यास सांगते, या रागातून एक्स्प्रेसमध्ये बसून दहा वर्षीय चिमुरडा जालना जिल्ह्यातून ठाण्यात आला होता. या मुलाला ठाणे शहर पोलिसांच्या बाल संरक्षण पथकाने त्याच्या पालकांचा शोध घेत अवघ्या तीन दिवसांत स्वाधीन केले.
ठाणे रेल्वेस्थानक परिसरात दहा वर्षीय चिमुरडा रडताना सापडला होता. त्याला उल्हासनगर येथील बालसुधारगृहात दाखल केले होते. ठाणे शहर पोलिस दलाच्या बाल संरक्षण पथकाने तेथे जाऊन त्या चिमुरड्याला विश्वासात घेऊन त्याला बोलते केले. मात्र तो अचूक पत्ता सांगत नव्हता. तो फक्त जालना येथेच राहत असल्याचे सांगत होता. ७ मार्च रोजी त्याची आई शिकवणीला जाण्यासाठी तगादा लावत होती. मात्र तो थेट शाळेत गेला.
पण शाळेतील मैदानात मित्रांसोबत क्रिकेट खेळू लागला. जिंकण्यासाठी त्याच्या संघाला दोन धावांची आवश्यक असताना तो बाद झाला. आपल्याला धावा करता आल्या नाहीत. तसेच आई शिकवणीला जाण्यासाठी तगादा लावते, याचा राग मनात धरून जालना रेल्वेस्थानकातून मुंबईकडे येणाऱ्या एक्स्प्रेसमध्ये बसला आणि तो ठाण्यात उतरला होता.
जालना जिल्ह्यातील तब्बल १८ पोलिस ठाण्यांशी संपर्क साधला. त्यामधील तो कदिम जालना या पोलिस ठाण्याच्या हद्दीत राहत असल्याचे स्पष्ट झाले. त्याला पालकांच्या स्वाधीन केल्याने तो स्वगृही परतला आहे.
- प्रीती चव्हाण, सहायक पोलिस निरीक्षक, बाल संरक्षण पथक, ठाणे शहर पोलिस
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
