देवळे विभागात बिबट्याची दहशत; परिसरातील नागरिक भयभीत

पोलादपूर - पोलादपूर तालुक्यातील दुर्गम डोंगराळ भाग असणाऱ्या देवळे विभागामध्ये गेल्या अनेक दिवसापासून बिबट्याचा (Leopard) वावर वाढला असून येथील शेतकरी वर्ग भयभीत झाला आहे. तर दोन दिवसापूर्वी देवळे (Devale) येथील शेतकरी गोविंद धोंडू केसरकर यांची कालवड बिबट्याने हल्ला (Attack) करून मृत केली आहे. व याच्या अगोदर दोन महिन्यापूर्वी श्री. विष्णू मुरडे व श्री. केसरकर यांच्या गुरांवर बिबट्याने हल्ला केला होता. त्यामुळे या विभागात बिबट्याची दहशत निर्माण झाली असून, त्यावर वन विभागाने तातडीने उपाययोजना करणे गरजेचे आहे.

दरम्यान, देवळे येथे बिबट्याने हल्ला केला, त्याठिकाणी वनविभागाचे परिमंडळ वनाधिकारी पोलादपूर श्री श्याम गुजर, वनरक्षक प्रियांका जाधव यांनी घटनास्थळी जाऊन पंचनामा केला असून, प्रस्तुत प्रतिनिधीशी बोलताना विभागाचे परिमंडळ वनअधिकारी श्री श्याम गुजर त्यांनी शेतकऱ्यांना सदर परिसरात जाऊ नये अशा सूचना केल्या. तसेच, अशी कोणतीही घटना घडल्यास ताबडतोब परिमंडल वनाधिकारी पोलादपूर यांच्याशी संपर्क साधण्याचे आवाहन केले आहे. दरम्यान, गोविंद केसरकर या शेतकऱ्याने वनविभागाकडे नुकसानभरपाईची मागणी देखील केलेली आहे.