मालाड : लिफ्टमध्ये अडकल्याने १२ वर्षीय मुलाचा मृत्यू

मालाड : मालाड (Malad) पश्चिमेतील भुजाले तलाव परिसरातील इमारतीच्या लिफ्टमध्ये अडकल्याने १२ वर्षीय चिमुकल्याचा मृत्यू (Death) झाला. संध्याकाळी पाच वाजेच्या सुमारास परिसरातील इमारत क्रमांक १३ येथे ही घटना घडली. या इमारतीत लिफ्ट (Lift) दुरुस्तीचे काम सुरू आहे. तिसऱ्या मजल्यावर राहणारे उदय राय यांचा १२ वर्षीय नातू त्याच्या आईसोबत शाळेतून घरी आल्यावर त्याने नेहमीप्रमाणे दुरुस्ती सुरू असलेल्या या लिफ्टमध्ये एक पाय ठेवला.

त्यानंतर अचानक लिफ्ट सुरू झाली. यावेळी एकाने मुलाला तातडीने बाहेर खेचण्याचा प्रयत्न केला; मात्र तोपर्यंत लिफ्ट वर गेल्याने मुलगा लिफ्टमध्ये अडकून गंभीर जखमी झाला. गंभीर जखमी मुलाला तातडीने चिंचोली बंदर येथील खासगी रुग्णालयात दाखल करण्यात आले; मात्र डाॅक्टरांनी तपासून त्याला मृत घोषित केले.

दरम्यान, लिफ्ट दुरुस्तीचे काम सुरू असताना खबरदारी म्हणून लिफ्टचे दार लॉक करण्याची गरज होती; मात्र लिफ्टचा दरवाजा उघडाच असल्याने हा अपघात झाल्याची माहिती आहे. तसेच, लिफ्टचे काम करताना सफेद व लाल रंगाच्या पट्ट्या लावणे आणि फलक लावणेही गरजेचे आहे; मात्र दुरुस्ती सुरू असताना फलक व पट्ट्याही लावले नसल्याचे समजते आहे. पोलिसांनी याप्रकरणी अपघाती गुन्ह्याची नोंद करून पुढील तपास सुरू केला आहे.