उल्हासनगरात रेकॉर्डवरील गुंडांच्या तडीपारांची हाफसेंच्युरी,अनेक गुंड वेटिंगलिस्टवर

उल्हासनगर : खून,खुनाचा प्रयत्न,खंडणी या गुन्ह्यांसोबतच हाणामाऱ्या करून परिसरात दहशत व कायदासुव्यस्थेचा प्रश्न निर्माण करणाऱ्या रेकॉर्डवरील गुंडांना तडीपार करण्याची मोहीम उल्हासनगरात सुरू ठेवली आहे.पोलिसांच्या आक्रमक पवित्र्यामुळे काही महिन्यातच तडीपारांची हाफसेंच्युरी पूर्ण झाली असून अनेक गुंड तडीपरीच्या वेटिंगलिस्टवर आहेत.अशी माहिती पोलीस उपायुक्त सुधाकर पठारे यांनी दिली.

काही महिन्यांपूर्वी तत्कालीन पोलीस उपायुक्त प्रशांत मोहिते,विद्यमान सहाय्यक पोलीस आयुक्त मोतीचंद राठोड यांनी झोपडपट्टी दादांच्या विरोधात जोरदार मोहीम उघडली होती.उल्हासनगर ठाण्याचे वरिष्ठ पोलीस निरीक्षक राजेंद्र कदम,मध्यवर्ती ठाण्याचे वरिष्ठ पोलीस निरीक्षक मधुकर कड,विठ्ठलवाडी ठाण्याचे वरिष्ठ पोलीस निरीक्षक संजय गायकवाड यांनी काढलेल्या लिस्टप्रमाणे 48 गुंडावर तडीपार,मकोका अंतर्गत नाशिक,पुणे येरवडा कारागृहात स्थानबद्धतेची कारवाई केली होती.

आता पोलीस उपायुक्त पदाचा नव्याने पदभार स्वीकारणारे सुधाकर पठारे यांनी कुलदीप मुकेश कंजानिया उर्फ भोळा आणि हिरा उर्फ हिरो कुकरेजा या गुंडांना तडीपार केले आहे.भोळा याच्यावर 4 व हिरा याच्यावर 10 गुन्ह्यांची नोंद आहे.आणखीन काही गुंड वेटिंगलिस्टवर असून उल्हासनगर पालिकेच्या निवडणुकीपूर्वी या सराईत गुंडावर तडीपारीची कारवाई केली जाणार असल्याचे पोलीस उपायुक्त सुधाकर पठारे यांनी सांगितले.