Manoj Jarange Patil: छगन भुजबळ महापुरुषांच्या जाती काढत आहेत; तेढ निर्माण करत आहेत

Manoj Jarange Patil: मंत्री छगन भुजबळ जातीय तेढ निर्माण करत आहेत. ते महापुरुषांच्या जाती काढत आहेत. आम्ही शांततेची भूमिका घेतली असताना त्यांची हातपाय तोडण्याची भाषा योग्य नाही. त्यांची भूमिका म्हणजे सरकारचीही हीच भूमिका आहे का, असा सवाल मराठा आंदोलनाचे नेते मनोज जरांगे यांनी केला आहे.

अशक्तपणामुळे जरांगे शहरातील एका खासगी रुग्णालयात दाखल आहेत. मंगळवारी त्यांनी माध्यमांशी संवाद साधला. ते म्हणाले, की मी कधी जातीयवाद केला नाही आणि करतही नाही. मात्र, काहीजणांनी राजकीय स्वार्थापोटी तो विषय अंगावर ओढून माझ्या शब्दाला जातीय रंग देण्याचा प्रयत्न केला. राज्यात शांतता राहिली पाहिजे, अशी माझी भूमिका आहे.

एक डिसेंबरला उत्तर देणार

सगळ्यांनीच मराठ्यांना आरक्षण दिले नाही. तब्बल ७० वर्षापासून सर्वच राजकीय पक्ष एकमेकांवर ढकलत आहेत. त्यामुळे आता सामान्य मराठा पेटून उठला आहे. आम्ही आरक्षण मिळवणारच, असे जरांगे यांनी ठणकावून सांगितले. मात्र, विषय भरकटविण्यासाठी एकमेकांवर चिखलफेक सुरू आहे. याला एक डिसेंबरच्या सभेत उत्तर देणार असल्याचे त्यांनी स्पष्ट केले.