Mumbai March : कोरोना योध्यांच्या प्रलंबित मागण्यासाठी आज मोर्चा

मुंबई - कोरोना काळात आपल्या प्राणाची पर्वा न करता रुग्णसेवा करणाऱ्या कोरोना योद्यांच्या न्याय मागण्यासाठी गुरुवारी (ता. २) रोजी सकाळी ११ वाजता म्यूनसिपल कामगार एकता मंचाच्या वतीने मोर्चा काढण्यात येणार आहे. शासकीय व प्रशासकीय, आरोग्य यंत्रणा धडाधड ढासळत होत्या. रुग्णालयामधील व्यवस्था तर अतिशय गंभीर होती. अतिशय प्रशिक्षित स्टाफ ही गोंधळलेल्या अवस्थेत होता. अशा वेळी रुग्णांच्या मदतीला रुग्ण सेवकांनी आपल्या जीवाची बाजी लावून रुग्ण सेवा दिली आहे. त्यामुळे शासकीय कर्मचाऱ्यांप्रमाणे रुग्ण सेवकांना ही शासनात सामावून घेत, आर्थिक लाभ देण्याची मागणी म्यूनसिपल कामगार एकता युनियनने केली आहे.

कोरोनाची लाटेत सेवा देणाऱ्या कोरोना योद्यांना सरकार, आरोग्य विभाग आणि इतर ठिकाणी काम करणाऱ्या कर्मचाऱ्यांना सुद्धा कामावरून कमी करण्यात आले आहे. राज्यभरात अशा कर्मचाऱ्यांची संख्या हजारो आहे. त्यांच्यावर झालेल्या अन्यायाला वाचा फोडण्यासाठी आणि न्याय हक्क व अधिकार मिळवून देण्याचा निश्चय म्युनिसिपल कामगार एकता युनियनने केला आहे. गेल्या सहा ते सात महिन्यांपासून या योद्यांना एकत्र करून त्यांच्या समस्या जाणून घेण्याचा प्रयत्न युनियनने केलेला असल्याचे अध्यक्ष मनोज यादव यांनी सांगितले आहे.

कोविड मध्ये काम करणाऱ्या कर्मचाऱ्यांना तडकाफडकी कामावरून कमी करणे, योग्य प्रकारे वेतन न देणे, कोव्हीड भत्ता न मिळणे, भत्यामध्ये कंत्राटदार व व्यवस्थापनाने भ्रष्टाचार करणे, बोनस न देणे, अशा अनेक समस्या दिसून आल्या आहेत. त्यामुळे सरकारी नोकरीत कोव्हीड योद्यांना सामावून घ्या, कोव्हीड भत्ता अन बोनस द्या, कोव्हीड योद्यांना सैनिकांचा दर्जा द्या या मागण्यासाठी गुरुवारी जेजे रुग्णालय सिग्नल, रिचर्डसन अँड कृडास कंपनी येथून आझाद मैदानावर मोर्चा जाणार असल्याचे यादव यांनी सांगितले आहे.