मज्जा वाटते म्हणून निर्बंध वाढवत नाहीय - आदित्य ठाकरे

मुंबई: राज्याचे पर्यटन आणि पर्यावरण मंत्री आदित्य ठाकरे (aditya thackeray) यांनी मुंबईच्या लसीकरणासंदर्भात (vaccination in mumbai) आज बैठक घेतली. "मुंबईत वेगाने लसीकरण करण्याचा प्रयत्न आहे. १८ वर्षांवरील सर्व व्यक्तींच्या लसीकरणाचं कसं नियोजन करायचं? त्याच्या नियोजनासाठी बैठक घेतली. लस हातात आल्यास सर्व मुंबईकरांचे लसीकरण करू शकतो" असे आदित्य ठाकरे म्हणाले. (Minister aditya thackeray talk about vaccination in mumbai)

"सुप्रीम कोर्टापासून पीएमनी मुंबई मॉडेलचे कौतुक केले आहे. जे सत्य आहे ते समोर आणत आहोत व नागरिक त्याला प्रतिसाद देतायत, असे आदित्य यांनी सांगितले. लॉकडाउन, निर्बंधांच्या मुद्यावर म्हणाले की, "कुणाला मज्जा वाटतेय म्हणून निर्बंध वाढवतोय किंवा काढत नाहीय. ही लाट गंभीर आहे." "आम्ही तिसऱ्या लाटेचा सामना करण्याची तयारी करतोय. आपण आकडे लपवलेले नाहीत. लोकांची जबाबदारी सरकारवर आहे" असे आदित्य ठाकरे यांनी सांगितले.

मुंबईत वेगाने लसीकरण करता यावे, यासाठी मुंबई महापालिकेने सुद्धा लस खरेदीसाठी निविदा काढल्या आहेत. कोरोनाच्या दुसऱ्या लाटेनंतर नागरिकांमध्ये लसीकरणाबद्दल मोठ्या प्रमाणावर जनजागृती निर्माण झालीय. नागरिक स्वत:हून लसीकरणासाठी पुढे येत आहेत. मुंबईत सरकारी बरोबर खासगी मार्गानेही मोठ्या प्रमाणावर लसीकरण सुरु आहे. अनेक खासगी सोसायट्या लसीकरणासाठी थेट लस पुरवठादार कंपन्या आणि हॉस्पिटल्सशी संधान बांधत आहेत.