ठाणे पोलिसांचे महागिरी कोळीवाड्यात मॉकड्रिल

ठाणे पोलिसांचे महागिरी कोळीवाड्यात मॉकड्रिल
ठाणे, ता. २७ (वार्ताहर) : महागिरी कोळीवाडा परिसरात भिंतीच्या ढिगाऱ्याखाली काही लोक अडकल्याची घटना घडली. त्यांना सुखरूप वाचवण्यासाठी ठाणे महानगरपालिका आणि ठाणे नगर पोलिस ठाण्यामार्फत बचावकार्य राबवण्यात आले; मात्र हे मॉकड्रिल असल्याने नागरिकांनी सुटकेचा निश्वास सोडला. हा मॉकड्रिल सोमवारी (ता. २७) रोजी सकाळी साडेदहाच्या सुमारास पार पडला.

ठाण्याच्या महागिरी कोळीवाडा श्री साती आसरा मंदिराजवळ महागिरी नाका येथे घराची भिंत पडून भिंतीच्या मलब्याखाली काही लोक अडकले आहेत, अशी माहिती सकाळी दहा वाजता आपत्ती व्यवस्थापन विभागाला प्राप्त झाली. ही माहिती प्राप्त होताच ठाणे नगर पोलिस स्थानकाचे पोलिस अधिकारी व कर्मचारी, नौपाडा-कोपरी प्रभाग समिती सहायक आयुक्त, अतिक्रमण विभागाचे कर्मचारी, आपत्ती व्यवस्थापन अधिकारी व आपत्ती व्यवस्थापन कक्षाचे कर्मचारी पिकअप वाहनासह त्वरित घटनास्थळी दाखल झाले. अग्निशमन दलाचे जवान फायर वाहन तसेच ठाणे आपत्ती प्रतिसाद दलाचे जवान बस वाहन तसेच ठाणे महापालिकेची रुग्णवाहिका घटनास्थळी दाखल झाली. भिंतीच्या ढिगाऱ्याखाली अडकलेल्या लोकांच्या सुटकेची रंगीत तालीम पार पडली.