Mumbai - Ahmedabad National Highway: मुंबई - अहमदाबाद राष्ट्रीय महामार्ग चिखलमय, दोनचाकी वाहनांना धोका!

संदीप पंडित

National Highway:

मुंबई-अहमदाबाद महामार्गाचे काँक्रिटीकरण वाहतुकदारांसाठी अवघड जागेवरचे दुखणे ठरले असताना त्यात महामार्गाच्यथा चिखलमय अवस्थेचा मनस्ताप वाहतुकदारांना सोसावा लागत आहे. त्यातच रस्त्यावर पडलेल्या खड्ड्यातून गाडी चालवणे अवघड होऊन बसले आहे.

तर दुसऱ्या बाजूला महामार्गालगत सुरू असलेल्या अवैध माती भरावासाठी दुरवरून आणला जाणारा मुरूम गाडीतून खाली महामार्गावर पडतो. त्यामुळे सध्याच्या पावसाळ्यात त्या मुरूमाचा चिखल होऊन महामार्ग चिखलमय झाला आहे. वसई पूर्व पट्टीतील महामार्ग मोठ्या प्रमाणात चिखलमय झाला असून दुचाकीस्वारांना या चिखलमय रस्त्यामुळे अपघाताचा धोका निर्माण झाला आहे.

वसई पूर्वेतील बापाणे, ससुनवघर, ससुपाडा, मालजीपाडा तसेच अन्य लगतच्या भागात मोठ्या प्रमाणात माती भराव सुरू आहे. गेल्यावेळेस याच अवैध माती भरावामुळे पावसाच्या पाण्याचा निचरा न होऊन महामार्गावर पाणी साचले होते. त्यामुळे तब्बल 9 ते 10 दिवस वाहतुकीला फटका बसला होता.

आता पुन्हा तेच उपद्रव भूमाफियांकडून महामार्गावर सुरू आहेत. मात्र पालिका प्रशासनाचे त्याकडे दुर्लक्ष होत आहे.कोरोनानंतर वसईतील बहुतांश चाकरमानी भाईंदर, मिरारोड, बोरीवली याठिकाणी कामाला जातात. त्यामुळे दुचाकीस्वारांना या चिखलमय रस्त्याचा ताप सोसावा लागत आहे.

दुचाकीस्वारांना या अशा चिखलमय रस्त्यावरून प्रवास करणे जोखमीचे वाटू लागले आहे.त्यातच सिमेंट काँक्रिटचे काम अर्धवट राहिल्याने ना नीट रस्ता ना सिमेंटचा रस्ता अशी अवस्था झाल्याने त्याच हि फटका महामार्गावरून प्रवास करणार्यांना बसत आहे.