मुंबई : ‘बीडीडी’तील वादग्रस्त घरे संचालकांच्या नावे होणार

मुंबई : बीडीडी चाळीतील (BDD Chaul) मूळ भाडेकरूचे निधन झाल्यानंतर त्याच्या पश्चात वारसदारांच्या नावे घर हस्तांतरण करण्याबाबत एकमत होत नसल्याचे दिसत आहे. संबंधित घराची पात्रता निश्चित करण्यास अडचण येत असल्याने अखेर गृह निर्माण विभागाने (housing department) अशा प्रकरणांमध्ये वादग्रस्त घर संचालकांच्या नावे करण्याच्या सूचना दिल्या आहेत. त्यामुळे वारसाच्या वादात घर हस्तांतरण करण्यास विलंब करणाऱ्यांना मोठा धक्का बसणार आहे.

राज्य सरकारने (mva Government) बीडीडी चाळ पुनर्विकासातील (redevelopment) लाभार्थींची पात्रता निश्चिती करण्यासाठी मार्गदर्शक सूचना जारी केल्या आहेत; मात्र चाळीतील मूळ भाडेकरूचे निधन झाल्यानंतर त्याच्या वारसदारांमध्ये (nominee) घर कोणाच्या नावे करावे याबाबत एकमत होत नाही.

अशा प्रकरणांमध्ये बीडीडी चाळी संचालकांकडे काही सुनावण्या झाल्या. सुनावणीसाठी संबंधित वारसदार उपस्थित राहत नसल्याने वारसा हक्काने गाळा हस्तांतरणाची प्रक्रिया प्रलंबित राहत आहे. त्याबाबत सरकारने पात्रता निश्चित करण्याबाबत सूचना द्याव्यात, असा प्रस्ताव म्हाडाने गृहनिर्माण विभागाला दिला होता. त्यानुसार गृहनिर्माण विभागाने अशा प्रकरणांमध्ये सद्यस्थितीत घरामध्ये वास्तव्य असलेल्या भाडेकरूंचे संक्रमण शिबिरात तात्पुरते स्थलांतर करावे, घर बीडीडी चाळी संचालकाच्या नावे ठेवण्यात यावे आदी सूचना गृहनिर्माण विभागाने दिल्या आहेत. वारसांकडून आवश्यक ती माहिती, कागदपत्रे उपलब्ध करून दिल्यानंतर घर वारसांच्या नावे हस्तांतरित करण्यात येणार आहे.