Mumbai : दुसऱ्या मजल्यावरून मांजराला खाली फेकले, मांजराचा जागीच मृत्यू..

शर्मिला वाळुंज

Mumbai - इमारतीच्या दुसऱ्या मजल्यावरून मांजराला खिडकीतून खाली फेकून दिल्याची धक्कादायक घटना ठाकुर्ली परिसरात घडली आहे. यामध्ये मांजराला गंभीर दुखापत होऊन त्याचा जागीच मृत्यू झाला आहे. याप्रकरणी टिळकनगर पोलीस ठाण्यात अज्ञात व्यक्ती विरोधात टिळकनगर पोलीस ठाण्यात गुन्हा दाखल करण्यात आला आहे.

ठाकुर्ली येथील 90 फिट रोडवरील डीएनएस बँकेजवळील सर्वोदय मंगल सोसायटीच्या इमारत क्रमांक 2 जवळ हा प्रकार मंगळवारी रात्री 9.30 च्या दरम्यान घडला आहे. याविषयी उघडपणे बोलण्यास कोणीही पुढे येत नसल्याने प्राणी मित्र संताप व्यक्त करत आहेत.

मांजराला वरुन फेकून त्याच्या मरणाला कारणीभूत ठरल्याने डोंबिवलीतील सामाजिक कार्यकर्त्या रेखा रेडकर यांनी अज्ञात व्यक्ति विरुध्द टिळकनगर पोलीस ठाण्यात तक्रार केली आहे.

पोलिसांनी प्राण्यांना क्रूरतेने वागण्यास प्रतिबंध कायद्याने सर्वोदय मंगल सोसायटीतील इमारत दोन मधील अज्ञात रहिवाशाविरुध्द गुन्हा दाखल केला आहे. साहाय्यक पोलीस निरीक्षक पी. बी. बाकले या प्रकरणाचा तपास करत आहेत.