मुंबईतील चेंबूर येथील सिद्धार्थ कॉलोनीत बुधवारी पहाटे एक हृदयद्रावक घटना घडली. सकाळी अंदाजे 4:30 ते 5:00 च्या सुमारास भीषण आगीने एका कुटुंबातील 7 जणांचा जीव घेतला. या दुर्घटनेत दोन लहान मुलांचाही समावेश आहे. शॉर्ट सर्किटमुळे ही आग लागल्याची प्राथमिक माहिती समोर येत आहे. घटनास्थळी पोलीस आणि अग्निशमन दल दाखल झाले असून, आग आटोक्यात आणण्यात आली आहे. इतर जखमींना तातडीने रुग्णालयात दाखल करण्यात आले आहे.
चेंबूरच्या सिद्धार्थ कॉलोनीत ही आग लागल्याचे समजते. पहाटेच्या वेळी घरात सर्वजण झोपेत असतानाच शॉर्ट सर्किटमुळे आग लागली आणि त्यात घरातील 7 सदस्यांचा मृत्यू झाला. या मृतांमध्ये एक 7 वर्षीय मुलगी आणि 10 वर्षीय मुलाचाही समावेश आहे. अग्निशमन दलाच्या तातडीच्या प्रयत्नांमुळे आगीवर नियंत्रण मिळवण्यात आले, मात्र ही घटना अत्यंत धक्कादायक ठरली आहे.
या दुर्घटनेत जखमी झालेल्या इतर नागरिकांना तातडीने उपचारासाठी घाटकोपरच्या राजावाडी रुग्णालयात दाखल करण्यात आले आहे. डॉक्टरांचे पथक घटनास्थळी आणि रुग्णालयात सतत काम करत आहे. आगीमुळे परिसरात खळबळ माजली असून स्थानिक प्रशासनाने या घटनेची सखोल चौकशी सुरू केली आहे.
मुंबईत आगीच्या घटनांमध्ये वाढ होताना दिसत आहे. काही दिवसांपूर्वीच आणखी एक अशी घटना घडली होती. अशा दुर्घटनांमुळे मुंबईकरांमध्ये चिंता व्यक्त होत आहे. विद्युत उपकरणांच्या देखभालीकडे दुर्लक्ष केल्यामुळे अशा घटना घडत असल्याची तक्रार अनेकदा समोर येत आहे.
या दुर्दैवी घटनेनंतर प्रशासनाने आणि स्थानिक नागरिकांनी भविष्यात अशा घटना टाळण्यासाठी ठोस उपाययोजना करण्याची मागणी केली आहे. खासकरून जुन्या इमारतींमधील विद्युत उपकरणे आणि वायरींची तपासणी करून त्यांची योग्य देखभाल केली जावी, असे नागरिकांचे मत आहे.
या घटनेमागील मुख्य कारण शॉर्ट सर्किट असल्याचे सांगितले जात आहे. मात्र, या संदर्भात अधिकृत तपासणी सुरू आहे. आगीमुळे झालेल्या नुकसानाचे मूल्यांकन अद्याप करण्यात येत आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
