BMC : एक महिन्यापूर्वी परदेशातून मुंबईत आलेल्या नागरिकांची होणार तपासणी

मुंबई : कोरोना संसर्ग (corona infection) डेल्टापेक्षा (Delta variant) कितीतरी पटीने अधिक धोकादायक असलेला ओमिक्रॉन (Omicron variant) हा नवीन प्रकार जगभरात मोठ्या प्रमाणात पसरत असल्याचे समोर येत आहे. दक्षिण आफ्रिकेसह (south Africa) अनेक देशांमध्ये पसरलेल्या कोरोना संसर्गाच्या या प्रकाराची संसर्गजन्य क्षमता खूप जास्त आहे, अशा परिस्थितीत पालिकेचा आरोग्य विभाग (bmc health authorities) त्याबाबत सतर्क झाला आहे.

त्यानुसार, नवीन रणनीती आखायला सुरुवात केली. याअंतर्गत आता आरोग्य कर्मचारी घरोघरी जाऊन महिनाभरापूर्वी परदेशातून मुंबईत आलेल्या नागरिकांची आरोग्य तपासणी करणार आहेत. यासोबतच पालिका या परदेशी नागरिकांची संपूर्ण माहितीही गोळा करणार आहे. परदेशातून आणि इतर राज्यांतून येणाऱ्यांवर ओमिक्रॉन प्रकारांबाबत बारकाईने लक्ष ठेवले जात आहे. अद्याप कोणताही धोका नसला तरी आरोग्य विभाग आतापासूनच सतर्क झाला आहे. शनिवारी पालिका आयुक्तांसोबत झालेल्या बैठकीत, टास्क फोर्सच्या सदस्यांनी नुकतेच परदेशातून मुंबईत आलेल्या परदेशी नागरिकांची पुन्हा आरोग्य तपासणी आणि चाचणी करण्याची सूचना केली होती, जी पालिकेने गांभीर्याने घेतली आहे.

पालिकेचे अतिरिक्त आयुक्त सुरेश काकाणी म्हणाले की, गेल्या एका महिन्यात विविध देशांतून मुंबईत आलेल्या सर्व लोकांची आरोग्य तपासणी केली जाईल. या सर्वांची माहिती विमानतळ प्राधिकरणाकडून प्राप्त झाली आहे. ही सर्व माहिती वॉर्ड स्तरावरील वॉर रूमकडे सुपूर्द करण्यात येणार आहे. यानंतर, त्यांच्या स्थानाची माहिती फोनवर संकलित केली जाईल, आरोग्य सेवा कर्मचार्‍यांकडून त्यांच्या घरी जाऊन आरोग्य तपासणी केली जाईल.

स्क्रिनिंग दरम्यान, कोरोनाची किरकोळ लक्षणेही आढळल्यास, त्यांची आरटीपीसीआर चाचणी केली जाईल. चाचणीत ते पॉझिटिव्ह आढळल्यास त्यांना संस्थात्मक क्वारंटाईन मध्ये पाठवले जाईल. याशिवाय स्क्रीनिंग दरम्यान परदेशी प्रवाशांकडून गेल्या एक महिन्यातील त्यांच्या प्रवासाचा इतिहास देखील गोळा केला जाईल.

काकाणी म्हणाले की, वरील माहिती कॉन्टॅक्ट ट्रेसिंगमध्ये खूप प्रभावी ठरेल. एवढेच नाही तर तपासात या परदेशी व्यक्तींना संसर्ग झाल्याचे आढळून आल्यास त्यांचे नमुनेही जीनोम सिक्वेन्सिंगसाठी पाठवले जातील. शिवाय, आज जवळपास 97 हून अधिक प्रवाशांचे नमुने गोळा करण्यात येणार आहे.