परमबीर सिंह यांना २० मे पर्यंत अटक नाही करता येणार

ठाणे: ठाण्यात दाखल झालेल्या गुन्ह्याच्या प्रकरणात मुंबईचे माजी पोलीस आयुक्त (Mumbai CP) परमबीर सिंह (Param Bir Singh) यांना २० मे पर्यंत अटक करता येणार नाही. आज राज्य सरकारने मुंबई उच्च न्यायालयात (Mumbai high court) ही माहिती दिली. दोन महिन्यांपूर्वी परमबीर सिंह यांच्या लेटरबॉम्बने राज्याच्या राजकारणात खळबळ उडवून दिली होती. परमबीर सिंह मुंबईचे माजी पोलीस आयुक्त होते. (Mumbai CP Param Bir Singh in Thane Case till next date Wont arrest)

परमबीर सिंह यांनी १०० कोटीच्या वसुलीचा खळबळजनक आरोप करुन राज्याचे माजी गृहमंत्री अनिल देशमुख यांना अडचणीत आणले. त्यानंतर अकोल्यातील पोलीस अधिकारी भीमराव घाडगे यांच्या तक्रारीनुसार परमबीर सिंह यांच्यावर गुन्हा दाखल करण्यात आला. परमबीर यांनी त्यांच्यावर ठाण्यात दाखल असलेला गुन्हा रद्द व्हावा आणि या प्रकरणात सीबीआयकडून चौकशी करण्यात यावी, यासाठी याचिका केलीय.

या प्रकरणात परमबीर सिंह यांना २० मे पर्यंत अटक करण्यात येणार नाही. आठवड्याभरात परमबीर यांच्या याचिकेवर राज्य सरकारकडून रिप्लाय फाईल केला जाणार आहे, तोवर अटकेची कारवाई होणार नाही.