Mumbai Crime: उत्तर प्रदेशहून पिस्तूल विक्रीसाठी आलेला आरोपी अटकेत

Mumbai News उत्तर प्रदेशमधून मुंबईत शस्त्र विक्रीसाठी आलेल्या एका आरोपीला मुंबई पोलिसांच्या गुन्हे शाखेने घाटकोपर परिसरात अटक केली. (ghatkopar crime )

हसमतअली शेख असे अटक आरोपीचे नाव असून तो गोवंडी परिसरात वास्तव्यास आहे. पोलिसांनी आरोपीकडून एक पिस्तूल आणि 3 जिवंत काडतुसे हस्तगत केली असून याप्रकरणी गुन्हे शाखा अधिक तपास करीत आहेत.

घाटकोपर परिसरातील राजावाडी रुग्णालयाजवळ एक व्यक्ती पिस्तूल विकण्यासाठी येणार असल्याची माहिती गुन्हे शाखेच्या अधिकाऱ्यांना मिळाली होती.

त्यानुसार गुन्हे शाखेच्या अधिकाऱ्यांनी बुधवारी रात्री उशिरा घाटकोपरच्या राजेवाडी रुग्णालयाच्या आसपास सापळा रचला. दरम्यान पोलिसाना एक संशयित काही संशयास्पद हालचाली करत असल्याचे पोलिसांच्या नजरेस आले.

पोलिसांनी आरोपीची तपासणी केली असता त्याच्याकडे एक पिस्तूल आणि 3 जिवंत काडतुसे सापडली. तातडीने पोलिसांनी आरोपीला ताब्यात घेतले. काही दिवसांपूर्वी ही बंदुक उत्तर प्रदेशमधून आणल्याची माहिती आरोपी हसमतअलीने चौकशीत पोलिसांना दिली. याप्रकरणी पोलीस अधिक तपास करीत असून शस्त्र पुरवठा करणाऱ्याचा शोध पोलीस घेत आहे.