Mumbai Crime: जीम ट्रेनरचा तरुणावर हल्ला, तरुण गंभीर जखमी!

Mumbai Crime: मुंबई - व्यायामशाळेत प्रशिक्षाकाने अन्य तरुणाला डोक्यात मुद्गल घालत गंभीर जखमी केले. ही घटना बुधवारी पहाटे मुलुंड पूर्वेकडील फिटनेस इंटेलिजेंस जीममध्ये घडली. जखमी तरुणाच्या तक्रारीवरून नवघर पोलिसांनी गुन्हा नोंदवत प्रशिक्षक धरव नाकेर याला अटक केली.

प्राथमिक चौकशीतून जखमी आणि आरोपी यांच्यातील नेमका वाद स्पष्ट झालेला नाही. मात्र हल्ला घडण्याआधी आरोपी प्रशिक्षक जखमी तरुणाकडे रागाने पहात होता, अशी माहिती पोलिसांना मिळाली आहे.

जखमी तरुणाचे नाव युगेश शिंदे(२०) असे असून त्याच्यावर खासगी रुग्णालयात उपचार सुरु आहेत. युगेशचे वडील रेल्वेत मोटरमन असून आई वैद्यकीय क्षेत्रात कार्यरत आहे. गेल्या दोन वर्षांपासून युगेश या व्यायामशाळेचा सदस्य आहे. बुधवारी मोहरम निमित्त सुटी असल्याने तो पहाटेच व्यायामशाळेत आला होता, अशी माहिती पोलिसांनी दिली.

व्यायामशाळेत लागलेल्या सीसीटिव्हीत हल्ल्याचा संपूर्ण घटनाक्रम कैद झाला असून तपासासाठी पोलिसांनी हे चित्रण ताब्यात घेतले आहे.