Mumbai Crime : रजनीकांतसोबत काम देण्याच्या बहाण्याने तरुणीला गंडवलं; १० लाख लुबाडले!

मुंबईतल्या दहिसर परिसरात राहणाऱ्या २१ वर्षीय मुलीची सुपरस्टार रजनीकांत सोबत काम करण्याची संधी देतो असं सांगत फसवणूक केल्याची घटना घडली आहे. या मुलीला १० लाखांचा गंडा घालण्यात आला आहे. या प्रकरणी मुलीने पोलिसांत तक्रार दिली आहे.

या मुलीने दिलेल्या तक्रारीनुसार, दहिसर पोलिसांनी आरोपी पियुष जैन व मंथन रुपारेल या दोघांवर कलम ४१९,४२०, ४६५, ६८, ४७१, ४ भादवि अंतर्गत गुन्हा दाखल केला आहे. या तरुणीला हैद्राबादच्या व्यंकटेश्वरा क्रिएशनने दोन सिनेमांची ऑफर दिली होती. RC-15 आणि जेलर असे दोन सिनेमे आपण बनवत आहोत, त्या दोन्ही चित्रपटांमध्ये सुपरस्टार रजनीकांत यांच्यासोबत काम करण्यासाठी निवड झाल्याचं या मुलीला सांगण्यात आलं होतं.

या भूमिकेसाठी पासपोर्ट, फॉरेक्स कार्ड, सरकारी परवानग्या हे सगळं तयार करण्याच्या नावाखाली आणि इतर विविध कारणं देऊन आरोपींनी १० लाख ३१ हजार ६३६ रुपये उकळले होते, असा आरोप तरुणीकडून करण्यात आला आहे. आरोपी पियुष जैन व मंथन रुपारेल यांनी या तरुणीला बनावट कागदपत्रंही तयार करून ती खरी असल्याचं सांगितलं होतं आणि या तरुणीला ती मेलवर पाठवली होती. मात्र दोघांनी कुठल्याही चित्रपटात काम न देता घेतलेली रक्कम ही परत न केल्यामुळे पीडित मुलीने दिलेल्या तक्रारीवरून दहिसर पोलिसांनी दोन्ही आरोपींविरोधात गुन्हा दाखल करून पोलिस अधिक तपास करत आहेत.