वीजचोरी करणाऱ्यावर गुन्हा; बोईसरमधील घटना

पालघर : व्यावसायिक गाळ्याबाहेर लावलेले वीजमीटर चोरून (electric meter robbery) त्याचा वापर निवासी व व्यावसायिक गाळ्यांमध्ये वीजचोरी करण्यासाठी होत असल्याची घटना बोईसर एमआयडीसी (Boisar MIDC) उपविभागात उघडकीस आली आहे. याप्रकरणी बोईसर येथील सोनू हृदयानंद पांडे याच्याविरुद्ध बोईसर पोलिस ठाण्यात (boisar police thane) फसवणूक आणि वीजचोरीचा गुन्हा दाखल (police FIR) करण्यात आला आहे.

अवधनगर येथील शेख कम्पाऊंडमध्ये थकबाकीपोटी वीजपुरवठा खंडित केलेल्या ग्राहकांच्या मीटरची तपासणी करत असताना उपकार्यकारी अभियंता लक्ष्मण राठोड, सहायक अभियंता राहुल पाचपांडे व वरिष्ठ तंत्रज्ञ तुषार जोशी यांना हा प्रकार निदर्शनास आला. थकीत रकमेचा पूर्ण भरणा करून विनंती अर्ज केल्यानंतर इबरार अलीबहादूर खान यांचा वीजपुरवठा खंडित करण्यात आला होता; परंतु प्रत्यक्ष पाहणीत त्यांचा वीजपुरवठा सुरू असल्याचे आढळून आले.

अधिक तपासणी केली असता खान यांच्याशिवाय शेख कम्पाऊंडमधील दुमजली इमारतीत असलेल्या ११ खोल्यांना एकाच मीटरमधून वीजपुरवठा सुरू असल्याचे निदर्शनास आले. मूळ ग्राहक राजेश उत्तम गुप्ता यांच्या द्विवेदी कम्पाऊंड येथील फरीहा अपार्टमेंटमधील दुकानाबाहेरून मार्च २०२१ मध्ये चोरीला गेलेले हे मीटर असल्याचे चौकशीत आढळले.

आरोपी सोनू पांडे याने राजेश गुप्ता यांचे मीटर चोरून मीटर शेख कम्पाऊंडमध्ये अनधिकृतपणे बसवले व ७४ हजार ८८० रुपयांची वीजचोरी केली. तसेच वीज जोडणीच्या नावाखाली शेख कंपाऊंडमधील रहिवाशांकडून आरोपी पांडे याने पैशे घेतल्याचेही फिर्यादीत नमूद करण्यात आले आहे. पांडे याच्याविरुद्ध गुन्हा दाखल करण्यात आला आहे. सहायक पोलिस निरीक्षक योगेश जाधव या गुन्ह्याचा तपास करत आहेत.