Mumbai Crime : रस्त्यावर गॅरेज थाटल्याचा जाब विचारताच; गॅरेज चालक, कर्मचाऱ्यांचा हल्ला

डोंबिवली - डोंबिवली पूर्वेतील टाटा पॉवर लेन परिसरात गाड्यांचे पार्ट विक्री व दुरुस्तीची दुकाने आहेत. या गॅरेज चालकांनी रस्त्यावरील फुटपाथ तर हडपलेच आहेच. शिवाय अर्ध्या अधिक रस्त्यावर वाहने उभी करून त्यांची दुरुस्ती केली जाते. रस्त्यावर वाहने उभी करू नका, रस्ता का अडवता असा जाब सामान्य नागरिक राजू चव्हाण यांनी विचारताच त्यांना गॅरेज चालक तसेच त्यात काम करणाऱ्या कर्मचाऱ्यांनी बेदम मारहाण केल्याची घटना डोंबिवली मध्ये रविवारी घडली.

यात राजू यांना गंभीर दुखापत झाली असून त्यांच्यावर खासगी रुग्णालयात उपचार सुरू आहेत. याप्रकरणी रामनगर पोलीस ठाण्यात अदखल पात्र तक्रार नोंद करण्यात आली आहे. या घटनेचे सीसीटीव्ही फुटेज व्हायरल झाले असून परप्रांतीय गॅरेज चालकांची दादागिरी समोर आली आहे.

डोंबिवली पूर्वेतील टाटा पॉवर लेन परिसरात अनेक गॅरेज, गाड्यांचे पार्ट विक्री, दुरुस्तीची दुकाने आहेत. या दुकानदारांनी दुकानासमोरील फुटपाथ आधीच अडविला असून अर्धा अधिक रस्ता देखील ते अडवितात. रस्त्यावर वाहने उभी करून त्यांची दुरुस्ती करण्याचे प्रकार येथे सुरू असतात.

डोंबिवली मधील नागरिक राजू चव्हाण यांनी अनेकदा या गॅरेज चालकांना रस्त्यावर वाहने उभी करण्यापासून मज्जाव केला आहे. सामान्य नागरिकांना चालण्यासाठी रस्ता उरत नाही. येथे अनेक अपघात देखील होत असल्याने

याप्रकरणी ते पालिका प्रशासन, वाहतूक विभाग व पोलीस प्रशासनाकडे पाठपुरावा करत असल्याचे राजू यांनी सांगितले. गॅरेज चालकांना ते अडवीत असल्याने त्यांना जीवे मारण्याची धमकी यापूर्वी देण्यात आली होती.

रविवारी दुपारी ते या परिसरात गेले असता येथील साई सीट कव्हर दुकान चालकासोबत राजू यांचा याच कारणावरून वाद झाला. यानंतर गॅरेज मालक व कर्मचाऱ्यांच्या टोळक्याने राजू यांना भर रस्त्यात मारहाण केली. राजू यांनी आपला जीव वाचवण्यासाठी पळ काढल्याचे राजू यांनी सांगितले. राजू यांना मार लागला असून त्यांच्यावर डोंबिवलीतील खासगी रुग्णालयात उपचार सुरू आहेत.

याप्रकरणी रामनगर पोलीस ठाण्यात अदखल पात्र तक्रार नोंद करण्यात आली आहे. सदर घटनेचे सीसीटीव्ही फुटेज व्हायरल झाले असून प्रशासन काय कारवाई करते हे आता पहावे लागेल.