मुंबईकरांना दिलासा; आज पुन्हा कोरोनाचे ५ हजार ८ रुग्ण

मुंबई : शहरात सध्या कोरोना (Corona) व्हायरस आटोक्यात येताना दिसत आहे, शहरात दररोज आढळणाऱ्या कोरोना रुग्णांची सध्या दिवसेंदिवस कमी होताना दिसत आहे, आता ही संख्या पाच हजारावर आली आहे, दरम्यान आज मुंबईत पुन्हा कालप्रमाणेच ५ हजार ८ रुग्ण आढळले आहेत, तर १२ मृत्यू झाले आहेत. शहरात लागोपाठ दोन दिवसापासून रुग्णसंख्या कमी नोंदवली जात असल्याने मुंबईकरांना काही प्रमाणात दिलासा मिळाला आहे. (Mumbai Latest Corona Updates In Marathi)

आज आढळलेल्या एकूण रुग्णांपैकी तब्बल ४,२०७ रुग्ण म्हणजेच ८४ टक्के रुग्ण हे लक्षणे नसलेले आहेत. तर ४२० रुग्णांना आज रुग्णालयात दाखल करण्यात आले. यामध्ये आज बरे होऊन घरी परतलेल्या रुग्णांची संख्या १२,९१३ राहिली, बरे झालेल्या रुग्णंचा दर हा ९७ टक्के राहिला आहे. तर १४ जानेवारी २०२१ ते २० जानेवारी २०२२ पर्यंत मुंबईतील एकूण कोरोना वाढीचा दर हा ०.७२ टक्के इतका राहिला आहे. दिलासादायक बाब म्हणजे मुंबईतील रुग्ण दुप्पटीचा दर हा ९३ दिवसांवर गेला आहे.