Mumbai Lift Accident : कमला मिल ट्रेड वर्ल्ड इमारतीतील लिफ्ट कोसळली; 12 जण जखमी

मुंबई - लोअर परळ सेनापती बापट मार्ग, कमला मिल कंपाऊंड मधील तळ अधिक १४ मजली ट्रेड वर्ल्ड इमारतीची लिफ्ट आज सकाळी ११.४० च्या सुमारास कोसळली. या दुर्घटनेत १२ जखमी झाले असून जखमींपैकी ८ जखमींना ग्लोबल रुग्णालय, तर एका जखमीला केईएम रुग्णालयात दाखल करण्यात आले आहे.

जखमींची प्रकृती स्थिर असल्याचे पालिकेच्या आपत्कालीन व्यवस्थापन नियंत्रण कक्षाकडून सांगण्यात आले. जखमींपैकी चार जखमींना किरकोळ दुखापत झाल्याने त्यांनी रुग्णालयात दाखल होण्यास नकार दिला.

लोअर परळ, सेनापती बापट मार्ग, कमला मिल कंपाऊंड मधील ट्रेड वर्ल्ड ही तळ अधिक १४ मजली इमारत असून या इमारतीच्या चौथ्या मजल्यावरुन ११.४० वाजता लिफ्ट खाली कोसळली. या दुर्घटनेत १२ जखमी झाले असून त्यांना उपचारासाठी ग्लोबल रुग्णालय व केईएम रुग्णालयात दाखल केले आहे.

प्रियंका चव्हाण (२६), रतिक शिंदे (२६), अमित शिंदे (२५), मोहम्मद रशीद (२१), प्रियांका पाटील (२८), सुधीर शहारे ( २९), मयूर गोरे ( २८), तृप्ती कुबल ( ४६) या जखमींना ग्लोबल रुग्णालयात दाखल केले आहे. तर किरण चौकेकर ( ४८) या जखमीवर केईएम रुग्णालयात उपचार सुरु असून प्रकृती स्थिर असल्याचे रुग्णालय प्रशासनाकडून सांगण्यात आले.