Mumbai Local: लोकल सेवेचे तीनतेरा, सततच्या बिघाडामुळे मुंबईकरांना मनस्ताप

मुबईची लाईफलाइन असलेल्या लोकल सेवेमध्ये आज पहाटेपासून अडथळे येत आहेत. त्यामुळे मुंबईकरांना घराबाहेर पडणे मुश्कील झाले आहे.

पहाटे नेरुळ स्टेशनवर तांत्रिक बिघाड झाल्याने हार्बर लाइनवरील वाहतूक विस्कळीत झाली होती. आता नुकत्याच हाती आलेल्या माहितीनुसार कांदिवली स्टेशनवर बिघाड झाल्याने लोकल सेवा ठप्प झाली आहे. यामुळे मुंबईकरांना मनस्ताप सहन करावा लागत आहे.

मिळालेल्या माहितीनुसार कांदिवली स्टेशनवर तांत्रिक बिघाड झाला आहे. त्यामुळे गेल्या 45 मिनिटांपासून इथली वाहतूक बंद आहे. यासह विरार-चर्चगेट मार्गावरील वाहतूकही ठप्प झाली आहे.

साम टिव्हीच्या प्रतिनिधींनी दिलेल्या माहितीनुसार, कांदिवली आणि मलाड रेल्वे स्थानकाच्या दरम्यान तांत्रिक बिघाड झाला आहे. याच्या दुरुस्तीचे काम गेल्या 45 मिनिटांपासून सुरू आहे. त्यामुळे या काळात विरार-चर्चगेट मार्गावर धावणाऱ्या 5 गाड्या थांबल्या आहेत. यामुळे मुंबईकरांचे मोठे हाल होत आहेत. असे असले तरी रेल्वे प्रशासनाकडून याबाबत कोणतीही माहिती देण्यात आलेली नाही.

गेल्या 45 मिनिटांपासून या गाड्या उभ्या असून, यामुळे वैतागलेल्या प्रवाशांनी गाडीतून उतरत रुळावरुन चालण्यास सुरूवात केली आहे. रेल्वे प्रशासनाने हा बिघाड दूर करण्यासाठी गेल्या 45 मिनिटांपासून सुरुता केली आहे. असे असले तरी यासाठी आणखी अर्धा ते पाऊण तास लागण्याची शक्यता आहे. याबाबतची माहिती रेल्वे अधिकाऱ्यांनी दिली आहे.