"प्रत्येक रविवारी आरे कारशेडविरोधात आवाज उठवणार"; आंदोलकांकडून पुन्हा आंदोलन

मुंबई : मुंबईतील आरे जंगल वाचवण्यासाठी पर्यावरणप्रेमींकडून पुन्हा आरे कारशेड विरोधात आंदोलन करण्यात येत आहे. आम्ही प्रत्येक रविवारी आंदोलन करू असा इशारा आंदोलकांनी दिला आहे. दरम्यान आंदोलनस्थळी मोठा पोलिस बंदोबस्त करण्यात आला आहे. महाविकास आघाडी सरकारने कारशेडला स्थगिती दिली होती पण भाजप सत्तेत आल्यावर त्यांच्याकडून स्थगिती उठवण्यात आल्यामुळे आंदोलन करण्यात येत आहे.

(Mumbai Aarey Forest Protest Updates)

दरम्यान, शिंदे फडणवीस सरकार विरोधात आंदोलकांनी जोरदार घोषणाबाजी केली आहे. सरकारच्या दडपशाहीविरोधात हे आंदोलन आहे. कोणत्याही परिस्थितीत आरे जंगल वाचवण्यासाठी आम्ही कटिबद्ध आहोत असं आंदोलकांकडून सांगण्यात आलं आहे.

"आरे जंगल वाचलं पाहिजे, आरेला जंगल घोषित करा. जोपर्यंत या मागण्या पूर्ण होणार नाहीत आणि कारशेडचे काम थांबणार नाही तोपर्यंत प्रत्येक रविवारी आंदोलन करणार असल्याचा पवित्रा पर्यावरणवाद्यांनी घेतला आहे. दरम्यान मागच्या वेळी शिवसेनेचे आदित्य ठाकरे आरे वाचवा या मोहिमेमध्ये सामील झाले होते. त्यांच्यासोबत अनेक लहान मुलेही मोहिमेत सहभागी झाले होते.

आंदोलनात लहान मुले असल्यामुळे एका संस्थेने राष्ट्रीय बालहक्क आयोगाकडे तक्रार केली होती. त्यानंतर आयोगाने मुंबईच्या पोलिसांना नोटीस देत याप्रकरणी तीन दिवसांत तपास करून अहवाल देण्याच्या सूचना केल्या होत्या. त्यामुळे आदित्य ठाकरे अडचणीत येणार का अशा चर्चा झाल्या होत्या.

आरे जंगल वाचवण्यासाठी पर्यावरण वाद्यांकडून अनेक प्रयत्न केले जात आहेत. आरे वाचवण्याची लोकलमध्येही काही लोकांकडून जनजागृती करण्यात येत आहे. पण महाविकास आघाडीने या प्रकल्पाला स्थगिती दिल्यानंतर शिंदे फडणवीस सरकारे पुन्हा आरे कारशेडचे काम चालू केले आहे. त्यामुळे पर्यावरणप्रेमींकडून आंदोलन करण्यात येत आहे.

त्याचबरोबर मुंबई मेट्रो प्रकल्पाच्या व्यवस्थापकीय संचालकपदावरूनआश्विनी भिडे यांची आघाडी सरकारने बदली केली होती पण आता पुन्हा भाजप सत्तेत आल्यावर भिडे यांच्याकडे मेट्रो प्रकल्पाची सूत्रे सोपवण्यात आली आहेत. त्यामुळे कारशेड प्रकल्पाला गती येणार असल्याच्याही चर्चा होत आहेत.