Mumbai : खासदार डॉ. श्रीकांत शिंदे यांनी जास्त लक्ष घातले तर यु टाईप रस्ताचे काम लवकर होईल - गणपत गायकवाड

डोंबिवली - कल्याण पूर्वेतील यु टाईप रस्त्याचे काम लवकर व्हावे यासाठी भाजप आमदार गणपत गायकवाड यांनी शिवसेना खासदार डॉ. श्रीकांत शिंदे यांना यात पुढाकार घेत लक्ष घालण्याची विनंती केली आहे. राजकारणात माझ्याकडे बोट दाखवले जात असले तरी सर्वांच्या अपेक्षा तुमच्याकडून आहेत.

कारण मुख्यमंत्री तुमचे वडील आहेत. मुख्यमंत्री एकनाथ शिंदे हे निर्णय घ्यायला वेळ लावत नाही पण त्यांनी ते मनात आणलं पाहिजे असे म्हणत आमदार गायकवाड यांनी खासदार डॉ. शिंदे यांना कल्याण पूर्वेतील विकास कामांकडे लक्ष घालण्याची मागणी केली आहे.

कल्याण पूर्वेतील एका कार्यक्रमात खासदार डॉ. श्रीकांत शिंदे, भाजपा आमदार गणपत गायकवाड हे एकच मंचावर उपस्थित होते. यावेळी भाषणात आमदार गायकवाड यांनी कल्याण पूर्वेतील विकास कामांबद्दल बोलताना खासदार डॉ. शिंदे यांना यात लक्ष घालण्याची विनंती केली.

कल्याण पूर्वेतील काटेमानवली नाका ते गणपती चौक व्हाया म्हसोबा चौक ते तिसगाव नाका या यु टाईप रस्त्याचे 80 फुटाचे रुंदीकरण करण्याच्या कामाला कल्याण डोंबिवली पालिकेने सुरवात केली आहे. मात्र हे काम संथ गतीने सुरू आहे.

हे काम पाहता यात खासदार डॉ. श्रीकांत शिंदे यांनी पुढाकार घेतला तर येत्या काळात हा रस्ता लवकर होऊ शकतो. असे आमदार गायकवाड म्हणाले. ते पुढे म्हणाले खासदार डॉ. शिंदे यांनी यात जास्त लक्ष घातल पाहिजे.

सर्वांच्या अपेक्षा तुमच्याकडे आहेत कारण मुख्यमंत्री तुमचे वडील आहेत. जरी राजकारणाच्या दृष्टीने माझ्याकडे बोट दाखवले जात असले तरी जनता तुमच्याकडे बघते. कारण का तर शिंदे साहेबांनी विचार केला तर शिंदे हे असे मुख्यमंत्री आहेत की ते निर्णय घ्यायला वेळ लावत नाहीत. जलद निर्णय घेतात पण त्यांनी मनात आणलं पाहिजे.

आणि तो यु टाईप रोड झाला पाहिजे. आपण पाहिलं तर ज्या शहराचे इन्फ्रास्ट्रक्चर चांगले असते त्याचा विकास होतो. या विकासासाठी लवकरात लवकर हा रस्ता झाला पाहिजे असे मत आमदार गायकवाड यांनी यावेळी व्यक्त केले. त्यामुळे खासदार शिंदे आता याकडे लक्ष घालणार कां हे पहावे लागेल.