Mumbai Mumbra: रस्त्यावरून जाणाऱ्या 3 वर्षीय चिमुकलीवर पाचव्या मजल्यावरून कुत्रा पडला, दुर्दैवी मृत्यू

Mumbai Mumbra: मुंब्य्रात एक दुर्दैवी घटना घडली आहे. कुत्रा अंगावर पडल्याने एका तीन वर्षीय चिमुकलीचा मृत्यू झाला आहे. चिमुकली तिच्या घरच्यांसोबत रस्त्यांवरून जात होती. तेव्हा अचानक तिच्या अंगावर वरून कुत्रा पडला. यानंतर ती जखमी झाल्याने तिला रुग्णालयात दाखल करण्यात आले होते. पण, डॉक्टरांनी तिला मृत घोषित केलं.

मिळालेल्या माहितीनुसार, चिमुकली रहदारीच्या रस्त्यावरून आपल्या आईसोबत जात होती. त्यावेळी इमारतीच्या एक मजल्यावरून एका कुत्र्याने खाली उडी घेतली. हा कुत्रा थेट चिमुकलीच्या अंगावर पडला. कुत्रा अंगावर पडल्याने चिमुकली गंभीर जखमी झाली होती. त्यामुळे तिला तात्काळ रुग्णालयात दाखल करण्यात आले पण त्याचा उपयोग झाला नाही.

पाचव्या मजल्यावरून हा कुत्रा चिमुकलीच्या अंगावर पडला होता. कुत्रा देखील या घटनेमध्ये जखमी झाला आहे. मिळालेल्या माहितीनुसार, प्राणीप्रेमींनी कुत्र्याला हॉस्पिटलमध्ये उपचारासाठी नेले आहे. यासंदर्भातील एक सीसीटीव्ही समोर आला आहे. यात दिसतंय की, कुत्रा अंगावर पडल्यानंतर चिमुकली बेशुद्ध पडते. कुत्रा देखील काहीवेळ निपचित पडतो. पण, त्यानंतर तो उठून रस्त्याच्या कडेला जातो.

घटना अमृत नगर भागातील आहे. येथील चिराग मेंशन इमारतीच्या टेरिसवर जैद सैयद नावाच्या व्यक्तीने कुत्रा पाळला होता. याच कुत्र्याने पाचव्या मजल्यावरून उडी घेतली होती. घटनेची माहिती मिळताच, प्राणीप्रेमी कुत्र्याला घेण्यासाठी आले होते. या घटनेची माहिती मुंब्रा पोलिसांना देण्यात आली आहे. पोलीस याप्रकरणी अधिक तपास करत आहे.