Mumbai News : छत्तीसगडच्या मुख्यमंत्र्यांचा सट्टेबाजीत सहभाग प्रवीण दरेकर यांचा आरोप

मुंबई - छत्तीसगडचे काँग्रेसचे मुख्यमंत्री भूपेश बघेल यांचा सट्टेबाजीत सहभाग असून महादेव अॅपच्या माध्यमातून त्यांना ५०८ कोटी मिळाले आहेत, हे पैसे निवडणुकीसाठी वापरण्यात येणार होते, असा गंभीर आरोप भाजपा विधानपरिषद गटनेते आमदार प्रविण दरेकर यांनी केला आहे. 

विकासाचा दावा करणारे काँग्रेस छत्तीसगडचा विकास करण्याऐवजी सट्टेबाजीत मग्न होते, अशी टीकाही दरेकर यांनी केली. ७ आणि १७ नोव्हेंबरला होणाऱ्या विधानसभेच्या निवडणुकीच्या पार्श्वभूमीवर महादेव अँपच्या प्रवर्तकाच्या माध्यमातून मोठी रक्कम छत्तीसगडमध्ये हलवली जात असल्याची माहिती दोन नोव्हेंबर रोजी ईडीला गुप्तपणे मिळाली. त्याआधारे ईडीने काही ठिकाणी छापे घातले. सत्ताधारी काँग्रेस पक्षाने या निवडणुकीसाठी मोठ्या प्रमाणात रोकड वितरित केल्याचे त्यातून समोर आले.

यासंदर्भात संयुक्त अरब अमिरातीतून पाठविण्यात आलेला खास दूत असीम दास यालाही ईडीने ताब्यात घेतले आहे. असीम दासचे घर व मोटारीतून सुमारे पाच कोटी ३९ लाख रुपये जप्त करण्यात आले असून असीम दास याने त्याची कबुलीही दिली असल्याचे दरेकर यांनी सांगितले.

असीम दास हा सोहम सोनीच्या माध्यमातून छत्तीसगडमधील काँग्रेस नेत्यांना पैसे पाठवत होता हे खरे आहे का ? असीम दासला व्हाईस मॅसेजद्वारे रायपूरला जाऊन भूपेश बघेल यांना निवडणूक खर्चासाठी पैसे देण्याचे आदेश देण्यात आले होते का ? दोन नोव्हेंबर रोजी हॉटेल टायटनमध्ये असीम दास यांच्याकडून पैसे जप्त करण्यात आले हे खरे आहे का ?

पीएमएलए अंतर्गत वेगवेगळ्या खात्यामध्ये १५ कोटी रुपये गोठवण्यात आलेत हे खरे आहे का ? असीम दास नावाच्या व्यक्तीकडून साडेपाच कोटीच्या आसपास रक्कम जमा करण्यात आली हे खरे आहे का ? असे प्रश्न विचारून या सर्व प्रश्नांची उत्तरे काँग्रेस पक्षाकडून अपेक्षित असल्याचेही दरेकर म्हणाले.

ईडीने महादेव अॅपची अनेक बोगस खाती शोधली आहेत. त्यातील साधारण १५ कोटी ५९ लाख रुपयांची शिल्लक ईडीने गोठवून असीम दासलाही अटक केली आहे. या सट्टेबाजी सिंडिकेटचे प्रवर्तक परदेशात बसून अनेक पॅनल चालवत असल्याचेही पुढे आले आहे.

त्यातून कोट्यावधी रुपयांची उलाढाल झाली असून ईडीने आतापर्यंत ४ आरोपीना अटक केली आहे. ५० कोटींहून अधिकची रक्कम जप्त केली आहे. तर १४ आरोपींवर गुन्हा दाखल करण्यात आला आहे, असेही दरेकर यांनी दाखवून दिले.