Dombivli Rain News : डोंबिवली पोस्ट ऑफिसला पाण्याने वेढले; पाणी उपसा पंप केवळ दिखावा

डोंबिवली - कल्याण डोंबिवली शहरात सकाळ पासून पावसाच्या जोरदार सरी बरसत असल्याने अनेक सखल भागात पाणी साचले होते. डोंबिवली एमआयडीसी मधील टपाल आणि पारपत्र कार्यालयाला देखील पावसाच्या पाण्याने वेढले गेले आहे.

कार्यालयाच्या चारही बाजूने पाणी साचल्याने परिसर जलमय झाला आणि कर्मचारी तसेच कार्यालयात येणाऱ्या ग्राहकांना गुडघाभर पाण्यातून वाट काढत ये जा करावी लागत आहे. याठिकाणी कायम पाणी साचत असून त्यावर उपाय म्हणून पाणी उपसा करणारा पंप प्रशासनाने येथे लावला आहे. मात्र तो केवळ दिखावा आहे का ? असा प्रश्न हा बंद असलेला पंप पाहून उपस्थित केला जात आहे.

डोंबिवली एमआयडीसी परिसरात अनेक ठिकाणी बांधकाम सुरू आहेत. या बांधकामाचा राडारोडा तसेच शहराच्या इतर भागातून येणारा राडारोडा हा एमआयडीसी मधील मोकळ्या जागेत टाकला जातो.

काम करणारे ठेकेदार हा राडारोडा उचलावा लागू नये म्हणून लगतच असलेल्या नाल्यात ढकलून देतात. यामुळे अनेक ठिकाणी नाल्याचे नैसर्गिक प्रवाह बंद झाले असून पाणी तुंबल्याच्या घटना घडतात. येथील पोस्ट ऑफिस कार्यालय परिसरात दरवर्षी आणि प्रत्येक पावसात गुडघाभर पाणी साचते. याकडे

एमआयडीसी अधिकारी दुर्लक्ष करत असल्याच्या रहिवाशांच्या तक्रारी आहेत. टपाल कार्यालय आवार जलमय झाल्याने कर्मचारी येथे येणारे नागरिक यांना गुडघाभर पाण्यातून वाट काढत पोस्ट ऑफिस मध्ये जावे लागले. किरकोळ पावसात देखील ही परिस्थिती उदभवत असल्याने मुसळधार पाऊस सुरू झाल्यानंतर टपाल कार्यालयात पाणी घुसण्याची शक्यता परिसरातील नागरिक, कर्मचाऱ्यांनी व्यक्त केली.

या ठिकाणी पाणी साचत असल्याने आपत्ती व्यवस्थापन विभागाकडून पाणी उपसा पंप ठेवण्यात आला आहे. मात्र तो बंद असून सकाळी गुडघाभर पाणी कार्यालय आवारात साचले होते. यामुळे हा पंप केवळ दिखावा म्हणून उभा केला आहे का ? असा सवाल नागरिक करत आहेत.

एमआयडीसी अधिकाऱ्यांनी एमआयडीसीतील नाल्यांची पाहणी करुन नाले बुजवून बांधकाम करणाऱ्या, नाल्यांमध्ये भराव टाकणाऱ्या ठेकेदार, विकासकांवर कारवाई करण्याची मागणी एमआयडीसीतील नागरिकांकडून केली जात आहे. मात्र या तक्रारिंकडे एमआयडीसी प्रशासन कायम दुर्लक्ष करत असल्याने नागरिक संताप व्यक्त करत आहेत.