Mumbai crime : देवाचे नाव घेत 101 पावले चाला बरकत होईल; दोघा भामट्यांनी 90 हजाराला लुटले

डोंबिवली : अंधश्रद्धे पायी अनेकांची लुबाडणूक होत असतानाही नागरिक त्याचा बळी जात आहेत. डोंबिवलीत दोघा भामट्यांनी एका तरुणाला देवा धर्माच्या नावाखाली आयुष्यात बरकत होण्यासाठी 101 पावले चालण्यास सांगितले. त्याला बोलण्यात गुंतवूण त्याच्या कडील 90 हजाराचा ऐवज चोरुन नेल्याची घटना घडली आहे. याप्रकरणी रामनगर पोलिस ठाण्यात दोघांविरोधात तक्रार दाखल करण्यात आली आहे. दाखल तक्रारीनुसार पोलिसांनी गुन्हा दाखल करत परिसरातील सीसीटिव्हीच्या आधारे भामट्यांचा शोध सुरु केला आहे.

डोंबिवली पूर्वेत राहणारे शंतनू मिश्रा (वय 39) हे शनिवारी सकाळी 11 च्या सुमारास फडके रोडने जात होते. येथील एका एटीएममधून त्यांनी 5 हजार रुपये काढले. त्यानंतर रस्त्याने पायी चालत जात रेल्वे स्टेशन कडे जात असताना बाटा शोरुम जवळ दोघा व्यक्तींनी त्यांना थांबवले. शंतनू यांना देवी देवतांविषयी माहिती देत बोलण्यात गुंतविले. त्यातील एकाने तुम्ही आता श्री गणेशाचा मनात जप करत 101 पावले चाला.

त्याकरिता तुमच्याकडे असलेल्या सर्व वस्तू बॅगेत ठेवा. त्या इसमाच्या बोलण्यावर विश्वास ठेऊन शंतनू यांनी त्यांच्याकडील सोन्याची चेन, सोन्याची अंगठी, टाईटन कंपनीचे घड्याळ, 5 हजारांची रोकड, बँकेची कागदपत्रे, एटीएम कार्ड बॅगेत ठेवले. तुम्ही आता मत्र जंप सुरू करा आणि तुमच्या हातातील बॅग माझ्या मित्राकडे द्या आणि तुम्ही आता सरळ 101 पावले चालत जा, असे सांगितले. शंतनू यांनी चालण्यास सुरूवात केली.

थोडे अंतर पुढे जाऊन पाठीमागे वळून पाहिले असता ते दोन्ही अनोळखी इसम दिसेनासे झाले. या प्रकाराने शंतनू यांनी कपाळावर हात मारून घेतला. आपली चक्क फसवणूक झाल्याची खात्री पटल्यानंतर त्यांनी पोलिस ठाण्यात धाव घेऊन घडलेल्या प्रकारची हकीकत सांगितली. पोलिसांनी शंतनू यांच्या तक्रारीवरून दोघा फरार भामट्यांच्या विरोधात गुन्हा दाखल केला आहे. गुन्हा दाखल होताच पोलिसांनी पथके तैनात करत सीसीटिव्ही फुटेजच्या आधारे भामट्यांचा शोध सुरु केला आहे.