Mumbai Traffic: मुंबईकरांची होणार वाहतूक कोंडीतून सुटका, 'या' उड्डाणपुलाची मार्गिका होणार सुरू

Latest Mumbai News: मालाड (पश्चिम) येथील मीठ चौकी, जोड मार्गावरील उड्डाणपुलाची एक मार्गिका आणि नवीन बांधलेल्‍या मालवणी टाऊनशिप महापालिका शालेय इमारतीचे लोकार्पण रविवार (ता. ६) दुपारी १२ वाजता केंद्रीय वाणिज्‍य व उद्योग मंत्री पियूष गोयल यांच्‍या हस्ते होणार आहे.

मार्वेकडून पश्चिम द्रुतगती महामार्गाकडे अर्थात पश्चिमेकडून पूर्वेकडे जाणाऱ्या मीठ चौकी जंक्‍शनवर नागरिकांना वाहतूक कोंडीला सामोरे जावे लागते. यावर उपाय म्‍हणून पालिकेने ‘टी’ आकाराचा उड्डाणपूल बांधण्‍याचा निर्णय घेतला. ११ एप्रिल २०२२ रोजी या कामाचे भूमिपूजन करण्‍यात आले.

मार्वे ते पश्चिम द्रुतगती महामार्गाकडे जाणारी मार्गिका आणि मार्वेकडून गोरेगावकडे जाणारी मार्गिका, अशी या उड्डाणपुलाची रचना आहे. त्‍यापैकी मार्वे ते पश्चिम द्रुतगती महामार्गाकडे जाणारी एकेरी मार्गिका वाहतुकीसाठी रविवारी खुली करण्‍यात येणार आहे. या मार्गिकेची लांबी ३९० मीटर असून रूंदी ८ मीटर आहे. दहिसर ते अंधेरी (पश्चिम) मेट्रो - २च्‍या उन्‍नत मार्गामुळे पालिकेने बांधलेल्‍या उड्डाणपुलाच्‍या उंचीवर मर्यादा आल्‍या आहेत. परिणामी हलक्‍या वाहनांसाठीच या उड्डाणपुलाच्‍या मार्गिकेचा वापर केला जाणार आहे.

तर मार्वेकडून गोरेगावकडे जाणारी उड्डाणपुलाची मार्गिका डिसेंबर २०२४ अखेरपर्यंत खुली करण्‍याचे नियोजन आहे. त्‍यादृष्‍टीने, दुसऱ्या मार्गिकेचे काम अत्‍यंत वेगाने पूर्णत्‍वाकडे नेण्‍यात येत आहे. या संपूर्ण प्रकल्‍पासाठी एकूण ५५ कोटींचा खर्च अंदाजित आहे. दरम्यान या उड्डाणपुलाची एक मार्गिका (मार्वे ते पश्चिम द्रुतगती महामार्ग) खुली केल्‍यामुळे नागरिकांची वाहतूक कोंडीतून सुटका होईल; परिणामी, वेळ आणि इंधनाची बचत होणार आहे.

मालवणी टाऊनशिप शालेय इमारतीचे लोकार्पण

मालाड (पश्चिम) परिसरात मालवणी - मार्वे मार्गस्थित मालवणी टाऊनशिप महापालिका शालेय इमारतीचे लोकार्पण रविवारी (ता. ६) होणार आहे. मालवणी टाऊनशिप पालिका शाळेची स्थापना सन १९६६ मध्ये झाली. पूर्वी या इमारतीचे स्वरूप तळमजला अधिक एक मजला असे होते. ही शालेय इमारत सन २०२० मध्ये निष्कासित करण्यात आली. त्यानंतर तळमजला आणि सहा मजले अशा स्वरूपात या शालेय इमारतीची पुनर्बांधणी करण्यात आली आहे.