Senate Elections: विधानसभेची सेमीफायनल, मुंबई कुणाची? प्रतिष्ठेची निवडणूक जाहीर! ठाकरे गट-भाजपसाठी अस्तित्वाची लढाई

मुंबई विद्यापीठाची सिनेट निवडणूक आता 22 सप्टेंबरला होणार आहे. मतमोजणीची प्रक्रिया 25 सप्टेंबरला होईल. मागील दोन वर्षांपासून रखडलेली ही निवडणूक आता सप्टेंबर महिन्यात निश्चित करण्यात आली आहे. या दरम्यान विधानसभा निवडणुका जाहीर झाल्यास किंवा आचारसंहिता लागू झाल्यास पुन्हा एकदा या सिनेट निवडणुकीवर टांगती तलवार पाहायला मिळू शकते.

सिनेट निवडणुकीसाठी एकूण दहा जागा

मुंबई विद्यापीठाच्या एकूण दहा सिनेट सदस्यांच्या जागांसाठी ही निवडणूक होणार आहे. त्यामध्ये पाच जागा खुल्या प्रवर्गासाठी असून, उर्वरित पाच जागा एससी, एसटी, ओबीसी प्रवर्गासाठी राखीव ठेवण्यात आल्या आहेत.

विधानसभा निवडणुकांमध्ये सर्व राजकीय पक्षांचा सहभाग

सिनेट निवडणुकीला विद्यापीठाच्या प्रतिष्ठेची निवडणूक म्हटले जाते. सर्व राजकीय पक्षांसाठी ही अस्तित्वाची लढाई असते. गेल्यावेळी ठाकरे गटाच्या सदस्य नोंदणीत मोठा वाटा होता. भाजपला तयारी करायला वेळ न मिळाल्याने ही निवडणूक रद्द करण्यात आल्याची चर्चा होती. मात्र आता पुन्हा एकदा निवडणुकीचे बिगूल वाजले आहे.

भाजप नेते ॲड. आशीष शेलार यांच्या तक्रारीवरून १७ ऑगस्टला सिनेट निवडणुका स्थगित करण्याचा निर्णय विद्यापीठ प्रशासनाने घेतला होता. यानंतर हे प्रकरण न्यायालयात असताना विद्यापीठाने व्यवस्थापन परिषदेत मतदारांच्या छाननीसाठी नेमलेल्या त्रिस्तरीय समितीचा अहवाल स्वीकारत ३० ऑक्टोबर ते ३० नोव्हेंबरदरम्यान निवडणुकीसाठी मतदारांची नव्याने नोंदणी करण्याचा कार्यक्रम जाहीर केला होता.

तर शिंदे गटाच्या आमदार मनीषा कायंदे यांनी सिनेट निवडणुकांवर नियंत्रण ठेवण्यासाठी निवृत्त न्यायाधीश किंवा आयुक्तांची नेमणूक करावी, अशी मागणी केली होती.

सविस्तर वेळापत्रक जाहीर

मुंबई विद्यापीठाने परिपत्रक काढून सविस्तर वेळापत्रक जाहीर केले आहे. 6 ऑगस्टपासून उमेदवारी अर्ज दाखल करण्यास सुरुवात होईल. 22 सप्टेंबरला सकाळी 9 ते सायंकाळी 5 दरम्यान मतदानाची प्रक्रिया पार पडेल. 25 सप्टेंबरला मतमोजणीला सुरुवात होऊन त्या दिवशी निकाल जाहीर केला जाईल.