पोलिसांची तत्परता! अवघ्या १२ तासात खूनी पतीला अटक

मुंबई: पत्नीच्या डोक्यात दगड टाकून हत्या (Murder) करणाऱ्या आरोपीला अटक करण्यात भायखळा पोलिसांना (Byculla Police) यश आले आहे. हत्या करून आरोपी गावी उत्तर प्रदेशात (Uttar Pradesh) पळण्याच्या तयारीत होता. पण पोलिसांच्या कार्यतत्परतेमुळे गुन्हा घडल्यानंतर अवघ्या 12 तासांच्या आत आरोपीला भायखळा पोलिसांनी अटक (Arrest) केली. (Murderer Husband arrested within 12 hours of crime)

नक्की काय घडलं...

कोरोनाच्या दुसऱ्या लाटेच्या पार्श्वभूमीवर भायखळा पोलिसांचे पथक कर्तव्य बजावत होते. त्यावेळी मुंबई पोलीस दलाच्या मुख्य नियंत्रण कक्षातून महिलेवर हल्ला झाल्याची माहिती आली. त्यानुसार भायखळा पोलिसांनी तत्काळ हॉस्पिटल गाठले. हॉस्पिटलच्या बाहेरील फूटपाथवर एक महिला रक्तबंबाळ अवस्थेत पडलेली होती. पोलिसांनी त्या महिलेला जे जे रुग्णालयात नेले. मात्र त्या महिलेचा मृत्यू झाल्याचे सांगण्यात आले. त्यानंतर भायखळा पोलिसांनी कलम 302 अंतर्गत गुन्हा दाखल केला.

या गुन्ह्याचा तपास करत असताना गुन्ह्याचा घटनस्थळी कोणतेही सीसीटीव्ही फुटेज अथवा प्रत्यक्षदर्शी साक्षीदार नव्हता. अशा स्थितीत पोलिसांनी तपास सुरू केला. तपासा दरम्यान आरोपी पती उत्तर प्रदेशातील मूळगावी पळून जाण्याच्या तयारीत असल्याचे पोलिसांना समजले. त्यानुसार सापळा लावून पोलिसांनी आरोपीचा कसोशीने शोध घेतला आणि आरोपी संतोष रामकिशोर यादवला ताब्यात घेतले. त्याची कसून चौकशी केली असता त्याने महिलेचा खून केल्याची कबुली दिली.तसेच, आरोपीचा मुंबईतील कोणताही कायमचा रहिवासी पत्ता नसल्याचे तपासात निष्पन्न झाले.

(संपादन- विराज भागवत)