'छोट्या खात्याचा मंत्री' म्हणणाऱ्या राऊतांना राणेंचं उत्तर

मुख्यमंत्री उद्धव ठाकरेंनाही लगावला टोला

मुंबई: पंतप्रधान मोदी (PM Modi) यांच्या केंद्रीय मंत्रिमंडळ विस्तारात (Cabinet Expansion) एकेकाळचे कट्टर शिवसैनिक आणि आताचे शिवसेनेचे कट्टर विरोधक असलेल्या नारायण राणे (Narayan Rane) यांना मंत्रिपद मिळालं. त्यांच्यावर सुक्ष्म, लघु आणि मध्यम उद्योग मंत्रालयाचा कारभार सोपवण्यात आला. राणे यांची राजकीय कारकिर्द पाहता त्यांना प्रतिष्ठेपेक्षा कमी महत्त्वाचं म्हणजे 'सूक्ष्म (छोटं)' खातं देण्यात आलंय, अशी खोचक प्रतिक्रिया शिवसेनेचे खासदार संजय राऊत यांनी म्हटलं. यावर नारायण राणे यांनी त्यांना चांगलंच प्रत्युत्तर दिलं. (Narayan Rane gives befitting reply to Shivsena Sanjay Raut CM Uddhav Thackeray)

संजय राऊतांना राणेंचे रोखठोक उत्तर

"नारायण राणे हे महाराष्ट्राचे माजी मुख्यमंत्री होते. त्यांनी विविध कालखंडात अनेक मंत्रिपदे भुषवली आहेत. नारायण राणे यांची राजकीय उंची पाहता त्यांना तितकं महत्त्वाचं खातं मिळालेलं नाही. त्यांना (नावाप्रमाणेच) सूक्ष्म खातं देण्यात आलं आहे. पण तरीही त्यांनी देशाचा आणि राज्याच्या विकासासाठी काम करावे ही अपेक्षा", असे मत संजय राऊत यांनी व्यक्त केलं होतं. त्यावर राणे म्हणाले, "केंद्रीय मंत्रिपद ही मोठी जबाबदारी आहे. हे खातं महत्त्वाचं आहे. कोणतंही खातं हे छोटं किंवा मोठं नसतं... मी जेव्हा खात्याचा कार्यभार पाहीन आणि मी जेंव्हा या खात्याला न्याय देईन, तेव्हा संजय राऊतांना कळेल की हे खातं किती महत्त्वाचं आहे!!"

मुख्यमंत्री ठाकरेंना पहिला टोला

"शरद पवार यांनी मला फोन केला. पवार मला म्हणाले की चांगले काम करा पण मुख्यमंत्री उद्धव ठाकरे यांनी मात्र मला अद्याप शुभेच्छा दिलेल्या नाहीत. कारण त्यांचे मन एवढं मोठं नाही. मला मंत्रीपद मिळाल्याबद्दल मुख्यमंत्र्यांनी अभिनंदन केलेले नाही पण महाराष्ट्रातील सर्व विभागातून मला शुभेच्छा मिळाल्या. त्याच मी त्यांच्या वतीने शुभेच्छा समजतो", अशा शब्दात त्यांनी उद्धव ठाकरेंना पहिला टोला लगावला.