Navi Mumbai: १४ वर्षीय मुलीची इंस्टाग्रामवर बदनामी; उचलले टोकाचे पाऊल; गुन्हा दाखल

Navi Mumbai: इयत्ता नववीत शिकणाऱ्या एका १४ वर्षीय मुलीची इंस्टाग्रामवर बदनामी करून तिला आत्महत्येस प्रवृत्त केल्याप्रकरणी दोघांविरोधात पनवेल शहर पोलिस ठाण्यात गुन्हा दाखल आहे.

करंजाडे येथे राहणारी १४ वर्षीय तरुणी कामोठे येथे नववीच्या वर्गात शिक्षण घेते. एक नोव्हेंबर रोजी तिची आई घरी आली असता मुलीने दरवाजा उघडला नाही, म्हणून त्यांनी दुसऱ्या चावीने दरवाजा उघडला.

यावेळी लोखंडी ग्रीलच्या छताच्या पत्राच्या खाली लोखंडी रॉडला ओढणीच्या सहाय्याने तिने गळफास घेऊन आत्महत्या केली. या घटनेची नोंद पनवेल शहर पोलिस ठाण्यात करण्यात आली होती.

याप्रकरणी अधिक चौकशी केली असता ऑक्टोबर महिन्यात शाळेतील वर्गात एका विद्यार्थ्याने पाठीमागून पाठीला हात लावत असलेला फोटो ‘काइन मास्टर’ या व्हिडिओ मेकर ॲपवर एक व्हिडीओ एडिट केला होता

. तसेच खाली अश्लील शब्द लिहून वेगवेगळ्या दोन इन्स्टा आयडीवरून प्रसारित केले. त्यामुळे संगनमत करून १४ वर्षीय तरुणीची बदनामी करून तिचे मानसिक खच्चीकरण केल्याची बाब तपासात समोर आली आहे. याप्रकरणी पनवेल शहर पोलिस ठाण्यात दोघांविरोधात मंगळवारी (ता.२१)गुन्हा दाखल करण्यात आला आहे.