Mumbai Local Crime: चेष्टामस्करी करण्याच्या वादातून धावत्या लोकलमध्ये मित्रावर चाकूहल्ला!

Mumbai Local Crime: टिटवाळा- वासिंददरम्यान धावत्या लोकलमध्ये एकमेकांची चेष्टामस्करी करण्याच्या वादातून दोघांनी मित्रासह एका सहप्रवाशाला चाकूने हल्ला करून गंभीर जखमी केले. याप्रकरणी कल्याण लोहमार्ग पोलिसांनी दोघांना अटक केली आहे.

कसाऱ्याहून मुंबईकडे चाललेल्या लोकलने प्रदीप शिरोसे प्रवास करत होते. यावेळी दत्ता भोईर (५५), अमोल परदेशी (४०, रा. शहापूर), तनुज जम्मुवाल (२१, रा. वासिंद) हे तिघेही प्रवास करत होते.

एकमेकांची चेष्टामस्करी सुरू असताना त्यांची प्रदीप शिरोसे यांच्याबरोबर झालेल्या बाचाबाचीतून अमोल याने रागाच्या भरात प्रदीप शिरोसे आणि दत्ता भोईरवर चाकूने हल्ला केला होता. याप्रकरणी कल्याण लोहमार्ग पोलिस ठाण्यात तक्रार दाखल झाल्यानंतर पोलिसांनी कल्याण स्थानकातून दोघा आरोपींना ताब्यात घेतले आहे. न्यायालयाने त्यांना पोलिस कोठडी सुनावली आहे.