नवी मुंबई : तळोज्यात सात जणांच्या दरोडेखोर टोळीला अटक

पनवेल : तळोजा (Taloja) फेज-एकमधील एटीएमवर दरोडा (ATM robbery) टाकण्यासाठी आलेल्या सात जणांच्या टोळीला तळोजा पोलिसांनी अटक (thief arrested) केली. टोळीकडून पोलिसांनी हत्यारे व इतर साहित्य जप्त केले. कारवाईत पकडण्यात आलेल्या टोळीतील सदस्य शुक्रवारी मध्यरात्री तळोजा फेज-एकमधील सोमेश्वर बिल्डिंगजवळ मारुती सुझुकी रिट्झ कारमधून आले होते. या वेळी दरोडेखोर तळोजा भागातील एटीएम तोडून त्यातील रोख रक्कम लुटण्याची तयारी करत होते. याचवेळी तळोजा पोलिस ठाण्यातील (taloja police station) गस्त पथक या ठिकाणी आले असता त्यांना टोळीच्या संशयास्पद हालचाली निदर्शनास आल्यानंतर त्यांनी तत्काळ त्यांच्यावर झडप घालून त्यांची धरपकड केली. अंधाराचा फायदा उचलत पळून जाऊ लागल्यानंतर पोलिसांनी त्यांचा पाठलाग करून पकडले.

पोलिसांनी त्यांची झडती घेतली असता, कोयता, विळा, कटावणी, चाकू, मिरची पूड व इतर साहित्य सापडले. पोलिसांनी सर्वांना ताब्यात घेऊन कारही जप्त केली. त्यांच्यावर दरोडा घालण्याचा प्रयत्न केल्याप्रकरणी गुन्हा दाखल करून सर्वांना अटक केली. मसुब पाशा शेख (३७), आदिल मुस्ताफा अन्सारी (२८), इरसाद मुस्ताफा शेख (२७), अब्दुल नदीम हसमी (२४), नाझीम अस्लम शेख (२६), प्रशांत रामसनई सिंग (२१), अरबान अरझन नईम अन्सारी (२१) या सात जणांना अटक केली आहे.