Navi Mumbai: बेकायदा वास्तव्यास असलेल्या तीन बांगलादेशी नागरिकांना झाली अटक

Navi Mumbai: तळोजा येथील पापडीचा पाडा भागात बेकायदा वास्तव्यास असलेल्या तीन बांगलादेशी नागरिकांना दहशतवादविरोधी पथकाच्या नवी मुंबई पथकाने अटक केली. यातील दोघे पुरुष काही वर्षांपासून; तर महिला काही महिन्यांपासून या ठिकाणी मजुरी व घरकाम करून बेकायदा वास्तव्य करीत असल्याचे चौकशीत आढळून आले.

तळोजा येथील पापडीचा पाडा भागात काही बांगलादेशी नागरिक बेकायदा वास्तव्यास असल्याची माहिती दहशतवादविरोधी पथकाच्या नवी मुंबई पथकाला मिळाली होती. पोलिस निरीक्षक प्रतिभा शेडगे यांच्या सुचनेनुसार सहायक पोलिस निरीक्षक वानखेडे व त्यांच्या पथकाने शुक्रवारी (ता. ८) सकाळी ७ वाजता तळोजा येथील पापडीचा पाडा भागातील जय मल्हार बिल्डींगमध्ये छापा टाकला.

या वेळी खोली क्र. २०१ मध्ये आलम गिर गजलु मुल्ला (वय ५३) हा राहत असल्याचे आढळून आले. खोली क्रमांक २०३ मध्ये सागोर बाकी खान (वय २६) व त्याची पत्नी रिया सागोर खान (वय २३) हे दोघे राहत असल्याचे आढळून आले. त्यामुळे दहशतवादविरोधी पथकाने तिघांविरोधात खारघर पोलिस ठाण्यात गुन्हा दाखल करून तिघांना अटक केली आहे.

गरिबीला कंटाळून भारतात घुसखोरी

दशतवाद विरोधी पथकाने तिघांना ताब्यात घेऊन त्यांच्याकडे चौकशी केली. आलम गिर गजलु मुल्ला याने २०१३ मध्ये तसेच सागोर उर्फ फिरदोस सिकदर बाकी खान याने २०१५ मध्ये बांगादेशातील गरिबीला कंटाळून घुसखोरीच्या मार्गाने भारतात प्रवेश केल्याचे सांगितले. रिया उर्फ शिखा सागोर उर्फ फिरदोस सिकदर खान हिने जुलै २०२३ मध्ये उपचारासाठी तिच्या पतीसह घुसखोरीच्या मार्गाने भारतात प्रवेश केल्याचे सांगितले.