२५ कोटी डीलचा आरोप, NCB करणार समीर वानखेडेंची चौकशी

मुंबई: आर्यन खान ड्रग्ज प्रकरणात (Aryan khan drug case) पंच प्रभाकर साईलने (prabhakar sail) केलेल्या गंभीर आरोपांमुळे या प्रकरणाला एक वेगळं वळण लागलं आहे. प्रभाकर साईलने दिलेल्या मुलाखतीमुळे समीर वानखेडे (sameer wankhede) यांच्या विश्वासहर्तेबद्दल गंभीर प्रश्नचिन्ह निर्माण झालं आहे. समीर वानखडे यांची NCB कडून विभागीय चौकशी होणार आहे.

"डीडीजी SWR कडून आमच्या डीजींना अहवाल मिळाला आहे. दक्षता विभागाला त्यांनी चौकशी करायला सांगितली आहे. मुख्य दक्षता अधिकारी योग्य प्रकारे चौकशी करतील. चौकशी सुरु झाली आहे. कुठल्याही अधिकाऱ्याबद्दल टिप्पणी करणं योग्य नाही" असे एनसीबीचे डीडीजी ज्ञानेश्वर सिंह यांनी सांगितले.

राष्ट्रवादी काँग्रेसचे नेतेआणि प्रवक्ते नवाब मलिक यांच्याकडून एनसीबीचे झोनल संचालक समीर वानखेडे यांच्यावर व्यक्तीगत स्वरुपाचे हल्ले सुरु आहेत. आज नवाब मलिक यांनी ट्विटरवर एक क्रॉप केलेला फोटो शेअर केला आहे. याला पहचान कौन असा कॅप्शन दिलं आहे. हा फोटो एनसीबीचे विभागीय संचालक समीर वानखेडे यांचा असल्याचं म्हटलं जात आहे. तसंच त्यांच्या पहिल्या लग्नातील हा फोटो असल्याचंही बोलण्यात येतंय.