मनीष भानुशालीचा भाजपाशी काय संबंध? प्रवीण दरेकरांनी दिलं उत्तर

मुंबई: ड्रग्ज प्रकरणात NCB ने क्रूझवर केलेल्या छापेमारीच्या कारवाईवर राष्ट्रवादी काँग्रेसने (ncp) गंभीर प्रश्नचिन्ह उपस्थित केलं आहे. शाहरुखच्या मुलासोत एका व्यक्तीचा फोटो व्हायरल झाला होता. या व्यक्तीचे नाव मनीष भानुशाली (manish bhanushali) असून तो भाजपाशी (Bjp) संबंधित असल्याचा गंभीर आरोप राष्ट्रवादीचे प्रवक्ते नवाब मलिक यांनी केला आहे. त्यावर आता विधान परिषदेचे विरोधी पक्ष नेते आणि भाजपा आमदार प्रवीण दरेकर यांनी उत्तर दिलं आहे.

"मनीष भानुशालीबद्दल माहिती नाही. मला कल्पना नाही. एनसीबी कार्यालय खुलासा करेल. कोणाला पाठिशी घालायचं कारण नाही. नवाब मलिक यांच्यावर जावयावर झालेली कारवाई अजून त्यांच्या पचनी पडलेली नाही. तो पोटशूळ त्यांच्या वक्तव्यातून दिसतोय" असे प्रवीण दरेकर म्हणाले.

"असं कधीच या देशात झालेलं नाही. सीबीआयची कारवाई झाली की सीबीआय, ईडीवर बोलायचं आता एनसीबीची कारवाई झाल्यावर तसंच चित्र उभ करायचा प्रयत्न होतोय" असे दरेकर म्हणाले. मनीष भानुशालीला भेटल्याचं मला तरी आठवत नाही, असे दरेकरांनी सांगितलं.

"नवाब मलिका बोलत असतील तर चौकशी होईल. एनसीबीची कारवाई सुरु झालेली असताना अंतिम निर्णय द्यायला, नवाब मलिक फायनल ऑथोरिटी नाहीत" असे दरेकर म्हणाले. मनीष भानुशालींचे पंतप्रधान मोदी, केंद्रीय गृहमंत्री अमित शहा यांच्यासोबतही काही फोटो समोर आलेत. त्यावर दरेकर म्हणाले की, "आता फोटो दाखवताय. खरे आहेत किंवा काय, डिजिटलायझेशन खूप आहे. आम्ही सार्वजनिक कार्यक्रमाला जात असतो. त्यावेळी अनेक जण भेटतात. प्रत्येक फोटो चेक करत नाही म्हणून एनसीबी पक्षपाती आहे असं बोलू नये. अनेक प्लॅटफॉर्म आहेत. तिथे न्याय मागू शकतो"