गुंडगिरीपेक्षा मुंबईकर वाहतूक कोंडीमुळे त्रस्त : मुंबई पोलीस आयुक्त संजय पांडे

गुंडगिरी किंवा संघटित गुन्हेगारीपेक्षा ध्वनी प्रदूषण, वाहतूक समस्या आणि ड्रग्ज या नागरिकांना भेडसावणाऱ्या मोठ्या समस्या असल्याचे मुंबईचे पोलिस आयुक्त संजय पांडे म्हणाले. मंगळवारी ते मुंबईत पत्रकार परिषदेत बोलत होते.

संजय पांडे म्हणाले, ”मी जेव्हा मुंबई पोलिस आयुक्तपदाचा पदभार स्वीकारला, तेव्हा मला वाटले की शहराला त्रास देणारी सर्वात मोठी समस्या गुंडगिरी किंवा संघटित टोळ्या असतील. मात्र जेव्हा सोशल मीडियावर मुंबईकरांच्या प्रतिक्रिया जाणून घेतल्या तेव्हा मुंबईत सर्वात मोठी समस्या म्हणजे ध्वनी प्रदूषण आणि वाहतूक समस्या जाणवली.” ध्वनी प्रदुषणामुळे मुले आणि ज्येष्ठ नागरिकांना रात्री झोप येत नाही,असेही पांडे म्हणाले.

संजय पांडे पुढे म्हणाले, “बांधकामे करण्यास विशिष्ट वेळीची मर्यादा घालण्यात आली आहे. मात्र परवानगीच्या तासानंतरही बांधकामे सुरु ठेवणाऱ्या बिल्डरांवर पोलिसांनी कारवाई सुरू केली आहे. त्यांना वाटते की आम्ही फक्त मुंबई पोलीस कायद्यानुसार कारवाई करू. तथापि, आम्ही लवकरच त्यांची बाँडवर स्वाक्षरी करू, ज्याद्वारे नियम न पाळल्यास त्यांना लाखो रुपयांचा दंड आणि तुरुंगवासही भोगावा लागेल.”

गुन्हेगारीबाबतीत सर्वात मोठे आव्हान विचारले असता पांडे म्हणाले, “ड्रग्सचा धोका हे सर्वात मोठे आव्हान आहे. त्यामुळे संपूर्ण पिढी नष्ट होत आहे. मात्र त्या संदर्भात आम्ही योग्य पावले उचलत आहोत.”