OBC Melawa: "ओबीसींच्या हाती सत्ता द्या, ५ वर्षात मराठ्यांची गरिबी दूर करू"; प्रकाश शेंडगेंचं आवाहन

OBC Melawa:ओबीसींचा एल्गार मेळावा आज मुख्यमंत्री एकनाथ शिंदे यांच्या बालेकिल्ल्यात घेण्यात आला. या मेळाव्यात ओबीसींची जातीय जनगणना करण्यात यावी, असा ठराव मंजूर करण्यात आला आहे. यावेळी ओबीसी नेते प्रकाश शेंडगे यांनी संबोधित केले.

प्रकाश शेंडगे म्हणाले, जरांगे पाटील यांच्या गावातून आम्ही लढ्याला सुरुवात केली. ही लढाई ३६५ जमातीची आहे. जरांगे म्हणतात आपण धाकटे भाऊ आहोत. मग गेल्या ७५ वर्षात तुम्ही आम्हाला आमचा वाटा दिला का?. कारखाने, बँका, संस्था, सुतगिरणी सर्व तुमच्याकडे आमच्याकडे मात्र उसतोडी, हमाली, विटभट्टी हा सर्व घाट्याचा वाटा आमच्याकडे आला.

मराठा समाजाचे ५८ मोर्चे निघाले. कुठल्याही समाजाच्या आरक्षणाला धक्का न लावता आम्हाला आरक्षण द्या, अशी मराठा समाजाची मागणी होती. मराठ्यांच्या मोर्च्यामध्ये ४० टक्के ओबीसी समाज होता. सुप्रीम कोर्टात आरक्षण टिकलं नाही, त्याची शिक्षा ओबीसींना देणार का?, असा सवाल प्रकाश शेंडगे यांनी उपस्थित केला.

मराठ्यांना गरिबी ओबीसीमुळे नाही तर त्यांच्याच नेत्यांमुळे आली आहे. शेतकरी नेते, मुख्यमंत्री, अर्थमंत्री यांचे मग गरिबी कशी आली. माझी सर्वांना मराठा समाजाला देखील विनंती आहे. एकदा ५ वर्ष ओबीसींच्या हाती सत्ता द्या, मराठ्यांची गरिबी दूर केल्याशिवाय स्वस्थ बसणार नाही, असा विश्वास प्रकाश शेंडगे यांनी व्यक्त केला.  (Latest Marathi News)