'शरद पवारांनी फडणवीसांना सत्तेचा मंत्र नक्कीच दिला असेल'

मुंबई: राज्याचे विरोधी पक्ष नेते देवेंद्र फडणवीस (devendra fadnavis) यांनी काल राष्ट्रवादी काँग्रेसचे अध्यक्ष शरद पवार (sharad pawar) यांची सदिच्छा भेट घेतली. या भेटीसंदर्भात आज पत्रकारांनी शिवसेना नेता आणि खासदार संजय राऊत यांचं मत जाणून घेतलं. "महाविकास आघाडी सरकारला (MVA Govt) विरोधी पक्षाने सहकार्य करणं आवश्यक आहे. या संदर्भात पवारसाहेबांनी फडणवीसांना नक्कीच मार्गदर्शन केलं असेल" असं संजय राऊत म्हणाले. (On sharad pawar devendra fadnavis meet sajay raut reaction )

"महाराष्ट्राला विरोधी पक्षांची मोठी परंपरा आहे. शरद पवार विरोधी पक्ष नेते होते. त्याकाळात विरोधी पक्ष नेते म्हणून त्यांनी उत्तम काम केलं आहे. आपण इतर राज्यांप्रमाणे शत्रुत्व घेऊन बसत नाही. तुम्ही त्या भेटीकडे राजकीय हेतूने पाहणं चुकीचं आहे" असं संजय राऊत म्हणाले.

"शरद पवारांनी भेटीमध्ये देवेंद्र फडणवीसांना सत्तेचा मंत्र नक्कीच दिला असेल. सत्तेचा मंत्र अशा प्रकारे दिला असेल, ज्या पद्धतीने विरोधी पक्ष हा महाराष्ट्राच्या राजकारणात गोंधळ निर्माण करतो आहे. त्यामुळे पुढील शंभर वर्षे तरी महाराष्ट्रात विरोधी पक्षाची सत्ता येणार नाही अशा प्रकारचा हा मंत्र असेल" असे संजय राऊत म्हणाले.

प्रत्येक भेटीचा असा राजकीय अर्थ काढणं योग्य नाही. या भेटीनंतर 'ऑपरेशन लोटस' ची चर्चा सुरु झाली आहे. "'ऑपरेशन लोटस' बंगाल, महाराष्ट्रात विसरुन जा. हे यशस्वी होणार नाही" असा राऊत यांनी दावा केला.